Azərbaycan, Bakı, 25 avqust /Trend, müxbir T.Hacıyev/
Azərbaycanın müxalif Xalq Cəbhəsi Partiyasının (AXCP) qurultayı sentyabrın axırlarında keçiriləcək. Bu barədə çərşənbə günü Trend-ə AXCP sədrinin siyasi məsələlər üzrə müavini Fuad Qəhrəmanlı bildirib.
"Dünən partiyanın rəyasət heyətinin yığıncağı keçirilib. Yığıncaqda qərara alınıb ki, partiyanın qurultayı sentyabrın axırlarında keçirilsin. Dəqiq vaxt isə "Təbriz" kinoteatrı ilə imzalanacaq icarə müqaviləsində göstəriləcək", - Qəhrəmanlı əlavə edib.
Azərbaycan Xalq Cəbhəsi Azərbaycan Milli-Azadlıq Hərəkatı zamanı gizli şəkildə - 1989-cu ildə təsis olunub. Partiya kimi 1995-ci ildə qeydiyyatdan keçib. 2000-ci ilin avqust ayında partiya sədri Əbülfəz Elçibəyin vəfatından sonra, ideoloji səbəblərdən partiya iki hissəyə - Azərbaycan Xalq Cəbhəsi Partiyası (AXCP) və Klassik Xalq Cəbhəsi Partiyası (KXCP) qollarına bölünüb.
