Azərbaycan, Bakı, 5 avqust /Trend/
Azərbaycan effektiv dövlət modeli qurub və respublika qarşısında duran başlıca vəzifə öz potensialının aktivləşdirilməsidir. Trend-in Ekspert Şurasının üzvü Aleksey Vlasov belə hesab edir.
"Son vaxtlar keçmiş Sovet İttifaqının demək olar ki, bütün ölkələrində olaraq, mən başa düşürəm ki, "effektiv" və "qeyri-effektiv sistem" anlayışı var. Hazırda Azərbaycanın qurduğu model effektivdir [...] Sonra nə olacağını demək çətindir, - ekspert qeyd edib. - Azərbaycanın başlıca vəzifəsi öz potensialını aktivləşdirməkdir", - Vlasovun sözləri "Deutsche Welle"də dərc edilən Azərbaycana həsr olunmuş məqalədə yer alıb.
Məqalə Azərbaycandakı vəziyyətin ekspert və analitiklərlə təhlili əsasında qurulub.
Vlasovun fikrincə, ölkə [Azərbaycan] SSRİ-nin dağılması nəticəsində əldə etdiyi imkanlardan istifadə etməlidir.
"Azərbaycan çox şeyə qadirdir", - ekspert vurğulayıb.
"Azərbaycan demoqrafik mənada gənc ölkədir. O, yaxın onillikdə hansı yolla gedəcəyini hələ ki müəyyənləşdirməyib. Neftdən gələn gəlirləri insan kapitalına qoysa, onun böyük potensialı var", - Vlasov əlavə edib.
Onun fikrincə, Dağlıq Qarabağ münaqişəsi ilə bağlı həll olunmamış vəziyyət hazırda ölkənin "ən yaralı yeri"dir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.