Azərbaycan, Bakı, 27 fevral / Trend müxbir E.Mehdiyev/
ABŞ-ın nüfuzlu "The Washington Times" qəzetində Xocalı soyqırımının 20-ci ildönümü ilə əlaqədar İstanbuldakı Taksim meydanında keçirilən "Hamımız xocalılıyıq, hamımız qarabağlıyıq" adlı mitinq haqqında məqalə dərc olunub.
Trend-in məlumatına görə, məqalədə qeyd olunur ki, fevralın 26-da Azərbaycan bayrağını dalğalandıran on minlərlə türk Xocalı faciəsi qurbanlarının xatirəsini yad etmək üçün İstanbulda yürüş-mitinq keçirib.
Xatırladaq ki, 1992-ci il fevralın 26-da Ermənistan silahlı birləşmələrinin Xocalı şəhərinin yeddi minlik əhalisinə qarşı törətdiyi soyqırım aktı zamanı 613 soydaşımız, o cümlədən 106 qadın, 63 uşaq və 70 qoca xüsusi qəddarlıqla qətlə yetirilib, meyitlər üzərində təhqiredici hərəkətlərə yol verilib.