Azərbaycan, Bakı, 2 iyun /Trend, müxbir M.Əliyev/
Azərbaycan BMT Təhlükəsizlik Şurasında qarşısında duran vəzifələrin öhdəsindən layiqincə gəldi və sədrliyi uğurla başa vurdu. Trend-in məlumatına görə, bunu şənbə günü jurnalistlərə Azərbaycan XİN-in mətbuat katibi Elman Abdullayev bildirib.
"Azərbaycanın BMT Təhlükəsizlik Şurasında sədrliyi çox uğurlu keçdi. Azərbaycanın sədrliyi ərzində diplomatiyamızın səyləri dövlətimizin milii maraqlarının qlobal səviyyədə genişləndirilməsinə yönəldi", - o deyib.
Abdullayev qeyd edib ki, Şuradakı ilk günlərindən Azərbaycan öz öhdəliklərinə çox ciddi yanaşdı.
"Azərbaycan Prezidenti mayın 4-də terrorla mübarizədə beynəlxalq əməkdaşlığın gücləndirilməsi ilə bağlı çıxış edərək çağırış etmişdi, sonra isə bəyanat qəbul olunmuşdu", - XİN rəsmisi deyib.
Onun sözlərinə görə, Azərbaycanın sədrliyi müddətində 3 qətnamə qəbul edilib - ikisi Sudandakı vəziyyət, biri isə Qvineya-Bisauda hərbi çevrilişlə bağlı olub və mətbuat üçün yeddi bəyanat qəbul edilib.
Həmçinin, Azərbaycanın sədrliyi ərzində TŞ 13 açıq və 16 qapalı iclas keçirilib.
"18-24 may tarixlərində TŞ-yə üzv dövlətlərin BMT yanında daimi nümayəndələrinin Qərbi Afrika bölgəsinə səfəri baş tutub, 26-27 mayda isə İstanbulda Yaxın Şərqlə bağlı görüşlər keçirilib", - o deyib.