Azərbaycan, Bakı, 16 yanvar /Trend/
Əfqanıstan Prezidenti Həmid Kərzai ABŞ-ı Amerika qoşunlarının ölkənin mərkəzi hissəsinə hava zərbəsi nəticəsində 7 uşaq və 1 qadının ölümündə ittiham edib. Trend-in məlumatına görə, bu barədə "Frans Press" agentliyi Prezidentin ofisinin bəyanatına istinadən xəbər verir.
Bəyanatda qeyd olunur ki, ötən gecə Amerika qüvvələrinin bombardmanı nəticəsində ölkənin Pərvan vilayətində 1 qadın və 7 uşaq həlak olub, 1 nəfər isə xəsarət alıb:
"Əfqanıstan hökuməti artıq neçə ildir ki, ölkənin kəndlərində əməliyyatlara son qoymağı xahiş edir, lakin Amerika qoşunları bütün ikitərəfli razılaşmaların əksinə olaraq yaşayış rayonunu bombardman etdilər və dinc vətəndaşları qətlə yetirdilər".