Gürcüstan, Tbilisi, 30 may /Trend, müxbir N.Kirsxaliya/
Azərbaycan Gürcüstanın "Delta" Elmi-Müdafiə Mərkəzinin məhsullarına maraq göstərir. Bu barədə cümə günü Gürcüstanın Baş naziri İrakli Qaribaşvili və Azərbaycanın müdafiə naziri Zakir Həsənov arasında keçirilmiş görüşdə məlum olub.
Baş nazirin mətbuat xidmətindən Trend-ə verilən məlumata görə, tərəflər ikitərəfli münasibətləri, regionun enerji nəqli infrastrukturunun təhlükəsizliyinin təmin olunması baxımından Gürcüstan-Azərbaycan-Türkiyə üçtərəfli münasibətlərinin inkişaf perspektivlərini müzakirə ediblər.
İki ölkə arasında dost və tərəfdaşlıq münasibətlərini dərinləşdirməklə bağlı qarşılıqlı istək ifadə edilib.
Görüşdə, həmçinin Gürcüstanın müdafiə naziri İrakli Alasaniya iştirak edib.