Azərbaycan, Bakı, 10 aprel /Trend, müxbir İlkin İzzət/
Həbsdə olan jurnalist Rauf Mirqədirov barəsində seçilmiş həbs qətimkan tədbiri müddəti yenə də uzadılıb.
Trend xəbər verir ki, aprelin 9-da Nəsimi rayon məhkəməsində hakim Babək Pənahovun sədrliyi ilə keçirilən iclasda R.Mirqədirov barəsində seçilmiş həbs qətimkan tədbiri müddətinin 1 ay da uzadılmasına dair qərar çıxarıldığı elan edilib.
R.Mirqədirovun vəkili Elmar Süleymanov Trend-ə bildirib ki, onlar Nəsimi rayon məhkəməsinin bu qərarından apelyasiya şikayəti verəcəklər.
Qeyd edək ki, R.Mirqədirov 2014-cü il aprelin 19-da Türkiyədə saxlanılaraq Azərbaycana deportasiya olunub. Azərbaycan vətəndaşı Mirqədirov Rauf Həbibulla oğlunun Azərbaycanın suverenliyi, dövlət təhlükəsizliyi, ərazi toxunulmazlığı və müdafiə qabiliyyəti zərərinə olaraq 2008-ci ilin aprelindən etibarən Ermənistanın xüsusi xidmət orqanlarının əməkdaşları tərəfindən məxfi əməkdaşlığa cəlb edilərək onların tapşırıqları əsasında Azərbaycana qarşı düşmənçilik fəaliyyəti aparılmasında istifadə üçün ölkədəki ictimai-siyasi, hərbi sahədəki vəziyyət, həmçinin dövlət sirri təşkil edən digər məlumatları fotoşəkilllər və sxemlərlə birlikdə Ermənistan, Gürcüstan və Türkiyə ərazisində dəfələrlə görüşüb onlara verməsində əsaslı şübhələr olduğundan həmin faktla bağlı Cinayət Məcəlləsinin 274-cü (dövlətə xəyanət) maddəsi ilə cinayət işi başlanıb.
Ötən il aprelin 19-da saxlanılan R.Mirqədirov barəsində 3 ay müddətinə həbs qətimkan tədbiri seçilib. Bundan sonra R.Mirqədirov barəsində seçilmiş həbs qətimkan tədbirinin müddəti bir neçə dəfə uzadılıb.