Bakı. Elçin Mehdiyev - Trend:
Prezident İlham Əliyevin yeni siyasi islahatları Azərbaycan cəmiyyətinin monolitliyini təmin edir. Bunu Trend-ə Milli Məclisin Elm və təhsil komitəsinin sədri Bəxtiyar Əliyev deyib.
B.Əliyev bildirib ki, Ermənistanın Azərbaycana qarşı davam edən təcavüzü və dövlət sərhədinin Tovuz istiqamətində törətdiyi son təxribatları ilə əlaqədar siyasi partiyaların milli həmrəyliyə dair bəyanatı qəbul edilib:
“Əlbəttə, biz bunu gözləyirdik. Çünki Prezident İlham Əliyev IV çağırış Milli Məclisin 10 mart 2020-ci il tarixli birinci iclasındakı çıxışında bildirmişdi ki, ölkəmizdə aparılan genişmiqyaslı və çoxşaxəli islahatlar nəticəsində Azərbaycanın yeni siyasi konfiqurasiyası formalaşır. Bu isə siyasi partiyaların ölkənin həyatında fəal sosial iştirakçılılığının, məsuliyyətliliyinin artırılmasını tələb edir. Milli maraqlar və dövlət təhlükəsizliyi məsələlərində siyasi partiyalar bir mövqedən çıxış etməlidirlər. Prezident İlham Əliyevin təşəbbüsü ilə Prezident Administrasiyasının nümayəndələri demək olar ki, bütün siyasi qüvvələrin rəhbərləri ilə görüşlər keçiriblər. Bu təşəbbüs heç bir şərt qoymadan keçirilir və öz müsbət nəticələrini göstərir”.
Komitə sədri bildirib ki, bu günlərdə siyasi partiyalar Ermənistanın Tovuz istiqamətindən Azərbaycana qarşı əvvəlcədən planlaşdırılmış hərbi təxribat törətdiyi, mənfur düşmənin növbəti dəfə Vətən torpaqlarına göz dikdiyi zaman praktiki olaraq Azərbaycanın müstəqillik tarixində ilk dəfə olaraq müxtəlif proqramı, platforması, fərqli məqsədi və məramı olan siyasi partiyalar iqtidar partiyası ilə olan fikir ayrılığını, məsələlərə müxtəlif yanaşma tərzini bir yana qoyaraq, həmrəylik nümayiş etdirib və Ali Baş Komandanın yanında olduqlarını bəyan ediblər:
“Bu onu göstərir ki, ölkədə aparılan islahatlar yeni siyasi təfəkkürün və mədəniyyətin formalaşmasını təmin edir və partiya mənsubiyyəti, fikir ayrılıqları kənara qoyulub, eyni səngərin əsgərləri kimi dövlətə, vətənə qarşı təhlükəni dəf etmək üçün bütün siyasi qüvələr də bir yumruq kimi birləşiblər. Azərbaycanın bu yeni siyasi gerçəkliyi də düşmənlərimizə sarsıdıcı zərbədir. Başlarında 1990-cı illərin havası qalmış xarici qüvvələr gördülər ki, onların qarşısında müasir güclü demokratik, hüquqi dövlət dayanıb. Belə bir dövlətə qalib gəlmək mümkün deyil.
43 partiya sədrinin imzaladığı Birgə Bəyanatda qətiyyətlə bildirilir: “Biz, Azərbaycanın siyasi partiyaları Ali Baş Komandan, Prezident İlham Əliyevin ölkəmizin ərazi bütövlüyünün və əhalinin təhlükəsizliyinin təmin olunması, hər cür erməni fitnəsi və təxribatlarının qarşısının alınması istiqamətində həyata keçirdiyi siyasəti qətiyyətlə dəstəkləyir, onun ətrafında sıx birləşdiyimizi bəyan edirik. Xalqımızı həmrəyliyə, Vətənimizə qarşı uzanan qanlı erməni əllərini qətiyyətlə kəsib atmağa hər an hazır olmağa səsləyirik. Şərəfli tarixi olan Ordumuzla qürur duyur, onunla bir olduğumuzu ifadə edirik. Möhtərəm Prezidentimiz və Ali Baş Komandanımızı əmin edirik ki, hər birimiz Vətənimizin şərəfi və namusu yolunda onun istənilən tapşırığını hər an yerinə yetirməyə hazır olan müsəlləh əsgərik.”
Siyasi partiyalar milli həmrəylik nümayiş etdirərək Azərbaycan dövlətinin və Ali Baş Komandanın yanında olduqlarını birmənalı olaraq dilə gətirsələr də təəssüf ki, bəzi siyasi çevrələr bu təlatümlü günlərdə hadisələrə münasibət bildirməyərək kənardan müşahidə etməyə üstünlük vermişlər. Yəqin ki, onlar adətləri üzrə yenə də hansısa neqativ məqamlar axtarmağa, özlərini fərqli göstərmək üçün tənqid etməyə, mənasız xırdalıqları qabartmağa üstünlük verəcəklər”.
.jpg)
.jpg)