Noyabrın 30-da Qarabağ Azadlıq Təşkilatının (QAT) bir qrup fəal üzvü ABŞ, Fransa və Rusiyanın ölkəmizdəki səfirlikləri qarşısında etiraz aksiyası keçirəcək. Bu barədə Trend ə QAT-dan məlumat verilib. Bildirilib ki, hər üç səfirlik qarşısında aksiya ayrı-ayrı saatlarda növbə ilə keçiriləcək.
Qeyd edək ki, QAT ABŞ-ın Kaliforniya ştatının Montebello şəhərinin hazırda terrorçular yuvasına çevrilmiş Xankəndi (Stepanakert) ilə "qardaşlaşmaq" təşəbbüsünə etiraz olaraq aksiya keçirir. QAT fəalları Qarabağ probleminin sülh yolu ilə nizamlanması prosesinə cəlb olunmuş ATƏT-in Minsk qrupunun həmsədr dövlətləri olan ABŞ, Fransa və Rusiyanı Azərbaycanın milli maraqlarına zidd və qeyri-obyektiv mövqe nümayiş etdirməməyə çağırır. QAT hesab edir ki, həmsədr dövlətlərinin Qarabağdakı erməni separatçıları ilə hər hansı formada "dostluğunu" rəsmiləşdirməsi danışıqlar prosesinə və münaqişənin obyektiv nizamlanmasına zərbədir.