"Milli Demokratik Qüvvələr Birliyində (MDQB) seçkilərin nəticələri ilə bağlı yekdil qərar olmayacaq". Bu barədə Trend ə MDQB-nin təsisçilərindən olan Təkamül Partiyasının sədri Teyyub Qənioğlu bildirib.
Qeyd edək ki, adıçəkilən qurumda yalnız Təkamül Partiyası və Bütöv Azərbaycan Xalq Cəbhəsi Partiyası (BAXCP) təmsil olunur. BAXCP-nin sədri, millət vəkili Qüdrət Həsənquliyev parlament seçkilərinin demokratik keçirildiyini iddia etsə də, seçkilərdə uğur qazanmayan T.Qənioğlu bunun əksini söyləyir.
Təkamül Partiyasının sədri elə bu səbəbdən fikir ayrılığının yarandığını deyib: "Mən bu məsələdə heç vaxt Qüdrət Həsənquliyevlə razılaşmayacam". Partiya sədri əlavə seçkilərdə iştirak edib etməyəcəyinin də hələlik sual altında qaldığını söyləyib. Bu məsələ ilə bağlı yanvarın sonunda qərar veriləcəyini bildirib.