"Ölkə başçısını əmin edirəm ki, Prokurorluq qarşısında duran vəzifələrin yerinə yetirilməsi daha da yüksək səviyyədə təmin ediləcək". Trend xəbər verir ki, bu barədə prokurorluq əməkdaşlarının peşə bayramı münasibətilə Fəxri və Şəhidlər Xiyabanlarını ziyarət edən Azərbaycanın baş prokuroru Zakir Qaralov jurnalistlərə məlumat verib.
"Böyük bir qrup əməkdaşımızın peşə bayramı ərəfəsində ali xüsusi rütbələrə layiq görülməsi, orqan və medallarla təltif edilməsi, eyni zamanda prokurorluq işçilərinin hədsiz sevincinə səbəb olmuş sosial-maddi rifahının yaxşılaşdırılması, bu sahədə görülən digər tədbirlər üzərimizə böyük məsuliyyət qoyur. Dövlət səviyyəsində qayğını böyük etimad kimi qəbul etməklə yanaşı, ölkə başçısını əmin edirəm ki, bundan sonra da Prokurorluq qarşısında duran vəzifələrin yerinə yetirilməsi təmin olunacaq, dövlətçiliyimizin maraqlarının və qanunçuluğun təmin oulnması, həmçinin, cinayətkarlığa qarşı mübarizənin səmərəliliyi artırılacaq", - deyə Baş prokuror qeyd edib.
Qeyd edək ki, 1 oktyabr Azərbaycanda prokurorluq əməkdaşlarının peşə bayramı kimi qeyd olunur. Bu münasibətilə Respublika Baş Prokurorluğunda rəsmi tədbir keçiriləcək.