Müxalifətyönlü Azərbaycan Demokrat Partiyası (ADP) İdarə Heyətinin fevralın 9-da keçiriləcək iclasında partiyanın Ali Məclisinin sədri Akif Şahbazovun qurumda qalıb-qalmaması məsələsi müzakirə olunacaq. Trend in məlumatına görə, bu barədə ADP sədrinin birinci müavini Sərdar Cəlaloğlu bildirb.
S.Cəlaloğlu qeyd edib ki, Akif Şahbazovun Ali Məclisin yanvarın 27-də ADP-nin siyasi kursunu dəyişməsi və dövlət başçısı İlham Əliyevə dialoqla bağlı ünvanladığı müraciətin qüvvədən düşməsini bəyan etməklə səlahiyyət həddini aşıb.
Onun sözlərinə görə, Akif Şahbazovun təkbaşına belə bir qərar qəbul etməsi və bununla bağlı mətbuata məlumat verməsi partiyanın Nizamnaməsinə tamamilə ziddir.
"Akif Şahbazovun nə Məclis sədri kimi, nə də başqa bir statusda qəbul olunan qərara münasibət bildirməyə ixtiyarı yoxdur", -deyə ADP rəsmisi əlavə edib. O vurğulayıb ki, partiyanın Nizamnaməsinə görə, Akif Şahbazovun səsvermə zamanı qərarların qəbulunda səs hüququ yoxdur: "Necə olur ki, bu adam birdən-birə Məclisin qərarını ləğv etmək barədə qərar qəbul edir?"
ADP sədr müavini hesab edir ki, onların İlham Əliyevə dialoqla bağlı ünvanladığı məktub hüquqi qüvvəsini saxlayır. Sərdar Cəlaloğlu Akif Şahbazovu məhkəməyə verməyə belə hazır olduğunu deyir.
Qeyd edək ki, müxalifəti təmsil edən ADP hazırda "Azadlıq" siyasi partiyalar blokunun üzvüdür. 1991-ci ildə yaradılmış ADP-nin sədri, Azərbaycanın eks-spikeri Rəsul Quliyev 1996-cı ildən indiyədək mühacirətdə yaşayır.
