Azərbaycan, Bakı, 21 may / Trend , müxbir C.Babayeva/ Dünya Azərbaycanlıları Konqresinin (DAK) mayın 23-25-də Almaniyanın Köln şəhərində keçirilməsi planlaşdırılmış növbədənkənar qurultayının təxirə salınması texniki problemlərlə əlaqədardır. Bu barədə DAK sədri Sabir Rüstəmxanlının dünya azərbaycanlılarına ünvanladığı müraciətində bildirilib.
DAK daxilində yaranmış narazılıqlar nəticəsində İdarə Heyəti (İH) iki yerə bölünüb. İH-nin 16 nəfər üzvündən 11-i Rüstəmxanlını DAK-ın sədri seçib və iyunun 6-8-də Almaniyanın Köln şəhərində növbədənkənar qurultay keçirməyə hazırlaşır. İH-nin qalan üzvləri və tərəfdarları Qulamrza Səbri Təbrizinin sədrliyini dəstəkləyir və iyunun 20-22-də Brüsseldə Avropa parlamentində qurultay keçirəcəklər.
Rüstəmxanlının öncə Trend -a bildirdiyinə görə, Dünya Azərbaycanlıları Konqresinin birliyinə nail olmaq üçün qurultayın vaxtı dəyişdirilib.
Rüstəmxanlı müraciətində qurultayın 6-8 iyun tarixində keçirilməsi qərarının DAK İdarə Heyətinin toplantısında qəbul olunduğunu bildirib.
"Bu qərar DAK İdarə Heyətinin 10 üzvünün - Sabir Rüstəmxanlı, Adil Minbaşı, Səməd Fərtaş, Haide Bornak, Fəramərz Qulizadə, Mirəşrəf Fətiyev, Abuzər Bağırov, Rafiq Qafarov, Eldar Qaradağlı və Cavad Derəxtinin iştirak etdiyi toplantıda qəbul olunub", deyə müraciətdə qeyd olunub.
Dünya azərbaycanlılarına müraciətində Rüstəmxanlı milli birliyə nail olunmasının tərəfdarı olduğunu bildirib.
"DAK-dan narazı qalmış bütün tərəflərlə müxtəlif səviyyələrdə danışıqlar aparmışam və bir araya gəlmək üçün lazım olan bütün addımları ataraq güzəştlərə getmişəm", deyə DAK sədri müraciətdə bildirib.
