Azərbaycan, Bakı, 09 iyun/ "Tr müxbir E.Babayev/ Azərbaycanın müxalif "Azadlıq" bloku seçkilər ərəfəsi kütləvi aksiyalar keçirmək niyyətindədir. "Mitinqlərin keçirilməsi blokun gündəliyindən çıxmayıb və bu məsələ müzakirə predmetidir",- deyə bazar ertəsi Trend -a blokun üzvü, Vətəndaş və İnkişaf Partiyasının sədri Əli Əliyev bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəöhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. "Azadlıq" bloku isə, seçkiləri boykot edəcəyi barədə bəyanat verib.
Əliyev bildirib ki, hazırda ölkədə sərbəst toplaşmaqla bağlı problemlər var. "Hakimiyyət müxalifətə aksiyalar keçirmək üçün imkan vermir və şəhərin kənarında yerləşən əlverişsiz yerlər müxalifətə təklif olunur. Belə bir şəraitdə, bizim polislə, daxili qoşunların əsgərləri ilə qarşıdurmaya getmək fikrimiz yoxdur" - deyən Əliyev vurğulayıb ki, aksiya keçirilməsinə minimal şərait yaradılan kimi, blok aksiyalara başlayacaq. Aksiyalarda blokun seçdiyi boykot taktikası ilə bağlı cəmiyyətə müəyyən mesajlar veriləcək.
"Azadlıq" blokunda üç müxalifət partiyası - Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunur.
Məqalə müəllifi ilə əlaqə ünvanı: [email protected]
