Azərbaycan, Bakı, 10 fevral / Trend , müxbir K.Zərbalıyeva/ Bakı Apellyasiya Məhkəməsi Yasamal rayon Dini İcmasının qarşılıqlı iddia tələbini icraata qəbul etməkdən imtina edib.
Dini icmanın nümayəndəsi vəkil Muxtar Mustafayev çərşənbə axşamı Trend -a bildirib ki, məhkəmə qarşılıqlı iddia tələbinin Yasamal rayon məhkəməsində işə baxılarkən verilməli olduğunu əsas gətirərək, iddianı icraat götürməyib.
Trend -un arayışı: Yasamal rayon məhkəməsi ötən il noyabrın 28-də Yasamal rayon İcra Hakimiyyətinin iddiası əsasında, Murtuza Muxtarov küçəsi, 190 ünvanında yerləşən Məhəmməd Peyğəmbər məscidinin sökülməsi barədə qətnamə çıxarıb.
Məhkəmə qətnaməsi onunla əsaslandırılıb ki, qeyd edilən ünvanda "təyinatı məlum olmayan qeyri-yaşayış sahəsi" tikilib.
Məscid nümayəndələri Bakının Yasamal rayon məhkəməsinin qətnaməsindən Bakı Apellyasiya Məhkəməsinə şikayət veriblər.
Şikayətdə qətnamənin tamamilə əsassız və qanunsuz olması səbəbindən ləğv edilməsi, iddianın rədd edilməsinə dair yeni qətnamə çıxarılması xahiş olunur.
Vəkil bildirib ki, Dini İcmanın rəhbəri Mir Valeh Mövsümovun adından verilən qarşılıqlı iddiada məscidin layihəsinin Bakı Şəhər İcra Hakimiyyəti və Yasamal rayon İcra Hakimiyyəti tərəfindən təsdiq edilməsindən imtinanın qanunsuz hesab olunması və layihənin təsdiq edilməsinin məcbur edilməsi tələb olunur.
Mustafayevin sözlərinə görə, Yasamal rayon məhkəməsində qarşılıqlı iddaia ərisəsinin verilməsinə imkan verilmədiyindən, onlar bu iddianı Bakı Apellyasiya Məhkəməsində qaldırmalı olub.
Bakı Apellyasiya Məhkəməsinin qarşılıqlı iddia ərizəsini icraata qəbul etməkdən imtina etməsi barədə qərardan Dini İcma Ali Məhkəməyə kasasiya şikayəti verəcək.
Qafqaz Müsəlmanları İdarəsi (QMİ) qanunsuz tikildiyi iddia olunan Məhəmməd Peyğəmbər məscidinin sökülməsi ilə razı deyil.
Məscidin nümayəndələri Avropa Şurasının baş katibi Terri Devisə müraciət edərək Məhəmməd Peyğəmbər Məscidinin sökülməməsinə yardımçı olmasını xahiş ediblər.
Devis onların məktubuna cavab olaraq bildirib ki, məscidin sökülməsi ilə bağlı mübahisənin ölkə qanunvericiliyi çərçivəsində həllinə tərəfdardır və bu məsələ onun təmsil etdiyi qurumun səlahiyyətində deyil.
Məqalə müəllifi ilə əlaqə ünvanı: [email protected]
