Azərbaycan, Bakı, 02 oktyabr / Trend , müxbir A.Hüseynbala/
Azərbaycan Mətbuat Şurasının sədri hesab edir ki, regionlarda kütləvi informasiya vasitələri inkişaf etdirilməlidir.
"Regionlarda fəaliyyət göstərən kütləvi informasiya vasitələrinin ciddi problemləri var. Rayonların əksəriyyətində qəzetlər var və onların əksəriyyəti yerli icra hakimiyyətlərinin orqanlarıdır, müstəqil KİV-lərin sayı isə azdır. Onların çap keyfiyyəti də çox aşağı səviyyədədir", - cümə günü Trend -a Mətbuat Şurasının sədri Əflatun Amaşov bildirib.
Trеnd Nеws-un аrаyışı: Azərbaycanda dörd minə yaxın kütləvi infоrmаsiyа vаsitəsi qеydiyyаtdаn kеçib. Hаzırdа оnlаrdаn 600-ə yахını fəaliyyət göstərir. Təхminən 400-ə qədər qəzеt və jurnаl dərc оlunur, 8 ümumrespublika, 14 regional, 13 kabel televiziyası fəаliyyət göstərir. Аzərbаycаndа 50-yə yaxın elektron KİV, təxminən 20 informasiya agentliyi vаr. Qalanları isə internet resurslarıdır.
Amaşovun sözlərinə görə, region mətbuatının inkişafı ilə bağlı müəyyən məsələlər KİV-in inkişafına dövlət dəstəyi konsepsiyasında da öz əksini tapıb. "Regionlarda bazar münasibətləri hələ formalaşmayıb və əhalinin alıcılıq qabiliyyəti aşağıdır. Düşünürəm ki, regionlarda fəaliyyət göstərən qəzetlər yerli əhalinin tələbatını da ödəmir. Biz bunları nəzərə alaraq region mətbuatının inkişafı ilə bağlı konkret addımlar atacağıq", - şura sədri əlavə edib.
Onun fikrincə, bununla paralel olaraq regionlarda müstəqil mətbuatın da inkişafına ciddi ehtiyac var. "Bu inkişaf nəticəsində icra strukturlarından asılılıq da azalacaq. Bu səbəbdən şura ilk növbədə Azərbaycana regional mətbuatın lazım olub-olmaması, əgər lazımdırsa necə olmalıdır məsələsini araşdıracaq", - Amaşov vurğulayıb.
Amaşov deyib ki, şuranın şikayətlər komissiyasına regionlarda fəaliyyət göstərən KİV-lərin reketçiliklə məşğul olması ilə bağlı çox az şikayət daxil olur.
Məqalə müəllifi ilə əlaqə ünvanı: [email protected]
