Azərbaycan, Bakı, 29 mart / Trend , müxbir M.Əliyev/
Bakı Təhsil Məlumat Mərkəzi ABŞ təhsil qrupu ilə birgə Azərbaycan paytaxtında Amerika təhsil yarmarkası təşkil edəcək.
Yarmarka martın 30-da keçiriləcək. Yarmarkanın keçirilməsində məqsəd Birləşmiş Ştatlarda təhsil almaq imkanları barədə məlumat verməkdən ibarətdir. Bu barədə ABŞ-ın Azərbaycandakı səfirliyinin məlumatında deyilir.
Yarmarkada ABŞ-ın aparıcı universitetlərinin nümayəndələri iştirak edəcək. Həmin nümayəndələr universitetlərin təhsil proqramı və fəaliyyəti barədə təfərrüatlı məlumat verəcəklər.
"Amerika universitetləri Azərbaycan gənclərinin ABŞ-da təhsil almaları üçün yaxşı imkanlar yaradır. ABŞ-ın aparıcı universitetləri azərbaycanlı tələbələri öz universitetlərinə təhsil almağa dəvət edir. Bu sahədə inkişaf tendensiyası müşahidə olunur. Ötən il ABŞ-da təhsil almaq istəyən azərbaycanlı tələbələrin sayı 14 faiz artıb", - Bunu ABŞ-ın Azərbaycanda müvəqqəti işlər vəkili Donald Lu deyib.