Azərbaycan, Bakı, 5 yanvar /Trend, müxbir K.Zərbalıyeva/
Azərbaycanda vəkil olmaq üçün müraciət edən əvvəllər hakim və vəkil işləmiş şəxslərlə müsahibə başa çatıb.
Vəkillər Kollegiyasının sədr müavini Fərhad Nəcəfov çərşənbə günü Trend-ə bildirib ki, müsahibədə iştirak etmək üçün 40 nəfər müraciət edib.
Onlar VK-nın üzvlüyünə qəbul olunmaq üçün müsahibədə iştirak edib və 14 nəfər uğur qazanıb.
Bu həftə Rəyasət Heyətinin iclasında həmin şəxslər and içərək Kollegiyaya üzv qəbul olunacaqlar.
"Vəkillər və vəkillik fəaliyyəti haqqında" qanuna edilən sonuncu əlavə və dəyişikliklər qüvvəyə mindiyindən, əvvəllər hakim və ya vəkil işləmiş şəxslərə belə bir imkan yaradılıb.
Qanuna əlavə və dəyişikliklərdə qeyd olunur ki, əvvəllər vəkil (intizam qaydasında vəkillik fəaliyyətinə xitam verilmiş şəxslər istisna olmaqla) və ya hakim olmuş şəxslər yazılı test vermədən və icbari təlimə cəlb olunmadan, şifahi müsahibədən keçdikdən sonra vəkil ola bilərlər.
Əlavə və dəyişikliklərə qədər hakim və ya vəkil işləmiş şəxslər test imtahanı verməklə yanaşı, icbari təlim alandan sonra vəkillik fəaliyyətinə başlayırdılar.
Nəcəfov bildirib ki, vəkilliyə qəbulla bağlı elan olunmuş dördüncü müsabiqədə iştirak etmək üçün 600 nəfər müraciət edib.
Onun sözlərinə görə, bu dəfə vəkilliyə qəbulla bağlı müraciətlərin sayı əvvəlkilərlə müqayisədə daha çox olub.
O, qeyd edib ki, indiyədək vəkilliyə qəbulla bağlı 3 müsabiqə keçirilib və 500-dən artıq hüquqşünas Vəkillər Kollegiyasına qəbul edilib.
Sədr müavini imtahanların keçiriləcəyi tarixin hələlik müəyyənləşdirilmədiyini deyib.
Sənəd qəbulu ötən il iyulun 15-də başlayıb və vaxtı dekabrın 30-dək uzadılıb.
Azərbaycan vəkillərin sayına görə Avropa ölkələri sırasında sonuncu yerlərdə durur. Məlumata görə, Azərbaycanda əhalinin hər yüz min nəfərinə 5 vəkil düşür.
Hazırda Azərbaycanda 800-ə yaxın vəkil var.
