Azərbaycan, Bakı, 6 iyun /Trend/
İqtisadi Əməkdaşlıq Təşkilatına (İƏT) üzv ölkələrin ekologiya və ətraf mühit nazirlərinin iclası iyunun 9-da Tehranda keçiriləcək. Bunu İranın Ətraf Mühit və Ekologiya Təşkilatının rəhbəri Məhəmmədcavad Məhəmmədizadə deyib. Bu barədə Trend İran televiziyasının rəsmi xəbər saytı iribnews.ir-ə istinadən məlumat verir.
Məhəmmədizadə deyib ki, İƏT-ə üzv ölkələrin ekologiya nazirlərinin müavinləri səviyyəsində iclas iyunun 7-də Tehranda öz işinə başlayacaq, nazirlərin iclası isə iyunun 9-da keçiriləcək.
O əlavə edib ki, nazirlərin iclasında İƏT-ə üzv ölkələrdə ekologiyanın qorunması sahəsində regional əməkdaşlıq barəsində sənəd imzalanacaq.
"İclasda iştirak edəcək ekologiya nazirlərinin İran Prezidenti Mahmud Əhmədinejadla görüşləri olacaq", - Məhəmmədizadə deyib.
İƏT 1985-ci ildə yaradılıb. 1992-ci ildə təşkilata yeddi yeni dövlət - Qazaxıstan, Azərbaycan, Əfqanıstan, Qırğızıstan, Tacikistan, Türkmənistan, və Özbəkistan daxil olublar. Təşkilat 1993-cü ildə BMT-də, bir il sonra isə İslam Konfransı Təşkilatında müşahidəçi statusu alıb.