Azərbaycan, Bakı, 13 mart /Trend, müxbir İ.İsabalayeva/
Yaxın günlərdə Azərbaycan Turizm Assosiasiyası (AzTA) Amerika Qonaqpərvərlik Tədrisi İnstitutu (American Hotel and Lodging Educational Institute (AHLEI) ilə imzaladığı müqavilə əsasında Bakıda hotellərdə çalışan əməkdaşlar üçün təlimlər keçirəcək.
AzTA-nın icraçı direktoru Aydın Məmmədov çərşənbə axşamı Trend-ə deyib ki, təlimlər qonaqpərvərlik üzrə olacaq. Təlimlərin keçirilməsində məqsəd mehmanxanalarda xidmətin keyfiyyətinin artırmaqdır. Təlimlərdə iştirak edəcək namizədlərin seçimi artıq başa çatıb.
Məmmədovun sözlərinə görə, "Eurovision" mahnı müsabiqəsinə qədər bir necə qrup üçün bu təlimlərin keçirilməsi planlaşdırılır.
AzTA rəsmisi bildirib ki, təlimlər hələlik yalnız Bakı üzrə aparılacaq. Amma onun regionlarda da davam etdirilməsi nəzərdə tutulur.
