Azərbaycan, Bakı, 7 yanvar /Trend, müxbir H.Vəliyev/
.az milli domen zonasında bu gün 16310 internet-resurslarının sayı qeydə alınıb. Bu barədə bazar ertəsi WHOIS saytı məlumat yayıb.
2011-ci ilin yanvar ayının göstəriciləri ilə müqayisədə .az milli domen zonasında qeydə alınan internet-resurslarının artımı 24,5 faiz təşkil edib.
Qeydə alınan saytların ümumi sayından 15165 ədədi domendə birinci səviyyəli qeydə alınan resursların payına düşür. İkinci səviyyəli daha populyar domen .com.az-dır. Orada 665 sayt qeydə alınıb.
Populyarlığına görə üçüncü yeri .edu.az tutur. Orada 156 internet saytı qeydə alınıb.
Statistikaya əsasən, dünyada aktiv domen adların ümumi sayı (yanvarın 6-na olan vəziyyətə görə) 143 milyon ədədi ötür. Daha sıx zona .com hesab edilir. Orada 106 milyon internet-resurs aktivdir. İkinci yerdə .net-dir. Onun domenində 14,9 milyon aktiv ad var. Üçüncü yerdə .org-dur. Orada 10,1 milyon sayt var.
Qeyd edək ki, .az milli zonası rəsmi olaraq 1993-cü il avqustun 25-dən fəaliyyətə başlayıb. .az domenində qeydiyyatın dəyəri 20 manatdır. Domenin illik texniki dəstəyi də bir o qədər məbləğə başa gəlir.