...

Azərbaycanda arağın içindən çıxan həşəratla bağlı açıqlama verildi

Cəmiyyət Materials 31 Avqust 2015 13:35
Qablaşdırılmış içkilərin içərisindən müxtəlif həşəratların çıxması halları çox olur.
Azərbaycanda arağın içindən çıxan həşəratla bağlı açıqlama verildi

Trend-i buradan izləyin

Azərbaycan, Bakı, 31 avqust /Trend, müxbir Elmir Murad/

Qablaşdırılmış içkilərin içərisindən müxtəlif həşəratların çıxması halları çox olur. Bunu Trend-ə açıqlamasında Respublika Gigiyena və Epidemiologiya Mərkəzinin Qidalanma gigiyenası bölməsinin müdiri İmran Abdullayev deyib.

Onun sözlərinə görə, belə hallarla rastlaşanlar rəsmi olaraq aidiyyəti qurumlara müraciət etməlidirlər. Müraciətdən sonra həmin müəssisədə neqativ halların hansı səbəblərdən baş verdiyi araşdırılır: "İçərisindən hər hansı həşərat çıxan məhsulun hansı müəssisəyə aid olduğu müəyyənləşdirilir. Çünki həmin məhsul saxta da ola bilər. Əgər belə hal aşkar olunarsa, əlbəttə ki, o müəssisədə şüşələrin yuyulub-yuyulmaması, dezinfeksiya olunub-olunmaması yoxlanılır. Məhsulun hazırlanması prosesi texnoloji qaydalara tam riayət olunaraq həyata keçirilməlidir. Riayət olunmayanda isə biz müəssisədən bunu tələb edirik".

Şöbə müdiri qeyd edib ki, araşdırmalarda əsas məqsəd neqativ halları ortaya çıxarıb onları aradan qaldırmaqdır: "Amma neqativ hallar sübuta yetirildiyi təqdirdə cərimələrin tətbiq olunması istisna deyil. Yoxlamalar zamanı aşkara çıxarılan qayda pozuntularının dərhal aradan qaldırılması istiqamətində tapşırıqlar verilir. Təbii ki, cərimələr də qaçılmazdır. Neqativ hallar zamanı müəssisə rəhbəri İnzibati Xətalar Məcəlləsinə əsasən 200 manatdan 400 manatadək cərimə olunur".

Qeyd edək ki, bir neçə gün əvvəl "Gəncə şərab 2" zavodunun istehsal etdiyi "Zolotoy Bakal" məhsulunun içərisindən tarakan çıxmışdı. Bu barədə sosial şəbəkə istifadəçiləri xəbər vermişdi. Onların iddialarına görə, arağın içərisində 2 ədəd tarakana oxşar həşərat və bir ədəd kiçik qara qurd aşkarlanıb. İçkinin qapağının isə xüsusi başlıqla, zavod şəraitində bağlandığı qeyd olunur.

Məqalədə:
Xəbər lenti

Xəbər lenti