Bakı. Trend:
Səhiyyə sisteminin əsas həlqəsindən olan əczaçılıq sahəsi demək olar ki, cəmiyyətimizin bütün tərəflərini və üzvlərini əhatə edir.
Trend-in məlumatına görə, bunu “Əczaçılar Klubu” İctimai Birliyinin təşkilatçılığı ilə keçirilən konfransda KOBİA İdarə Heyətinin sədri Orxan Məmmədov deyib.
O qeyd edib ki, son illərdə Azərbaycan Respublikasında həyata keçirilən uğurlu iqtisadi siyasət əhaliyə göstərilən tibbi xidmətlərin müasir standartlara çatdırılması, bu sistemin maddi-texniki bazasının möhkəmləndirilməsi üçün əlverişli zəmin yaradıb.
“Bu sahədə fəaliyyət göstərən sahibkarların
rəqabətədavamlılığının artırılması, onların göstərdiyi xidmətlərin
daha da keyfiyyətli və müasir standartlara uyğunlaşdırılması
prioritet istiqamətlərdən birinə çevrilmişdir. Ümumilikdə,
Azərbaycanda tibbi məhsullar istehsal edən müəssisələrin
yaradılması ölkənin iqtisadi sənayesinin inkişafı və qeyri-neft
sektorunun payının artması baxımından mühüm əhəmiyyət kəsb edir.
Digər tərəfdən, əczaçılıq məhsullarının idxalına hər il orta
hesabla 300 milyon ABŞ dolları həcmində vəsaitin xərcləndiyini
nəzərə alsaq, əczaçılıq sektorunun inkişafı ölkəmizdən valyuta
axının azalmasına və yeni sərmayələrin cəlb edilməsinə də xidmət
etmiş olacaqdır.
Hələ də tam olaraq sona çatmayan COVİD-19 pandemiyası tibbi
məhsullar ilə özünütəminetmə məsələsinin əhəmiyyətini bir daha
diqqətə çatdırıb.
Azərbaycanda həm pandemiya dövründə, həm ondan əvvəl də istər əczaçılıq sənayesinin, istərsə də tibb sənayesinin inkişafı ilə bağlı əhəmiyyətli işlər görülmüşdür. Əczaçılıq üzrə ixtisaslaşmış Pirallahı Sənaye Parkı bu işdə böyük önəm daşıyır”, - deyə sədr bildirib.