Bakı. Trend:
Türkiyədə baş verən zəlzələ nəticəsində yalnız Hatay hava limanının fəaliyyəti dayandırılıb.
Trend-in məlumatına görə, bu barədə bu gün Türkiyənin vitse-prezidenti Fuat Oktay deyib.
Onun sözlərinə görə, digər hava limanlarından sərnişin daşınması həyata keçirilə bilər.
“Zəlzələdə həyatını itirənlərin sayının artacağını düşünürük. Hava şəraitinin pis olmasının da xilasetmə işlərinə təsiri var”,- deyə o əlavə edib.
Qeyd edək ki, Türkiyədə baş verən 7,7 bal gücündə zəlzələdə ölənlərin sayı 1541-ə, yaralıların sayı isə 9 733-ə çatıb. Təkanlar ölkənin 10 vilayətində ciddi dağıntılara səbəb olub.