Bakı. Trend:
Aztəminatlı ailələrdən olan yüzlərlə uşaq üçün ali təhsil almaq imkanı;
İcmaların özlərinə etibarlı gələcək qura bilməsinə dəstək.
Bu gün bp öz Azəri-Çıraq-Günəşli, Bakı-Tbilisi-Ceyhan, Şahdəniz və Cənubi Qafqaz Boru Kəməri layihələrindəki tərəfdaşları - “TPAO”, “SOCAR”, “SGC”, “LUKOİL”, “NİCO”, “MOL”, “Equinor”, “İNPEX”, “ExxonMobil”, “İTOCHU”, “Eni”, “TotalEnergies”, “ONGCVidesh” – adından “Gələcəyini qur” layihəsinin daha bir uğurlu ilinin nəticələrini qeyd etmək üçün tədbir keçirib.
bp və tərəfdaşlarının yeddi ildir ki, maliyyələşdirdiyi bu təşəbbüsün məqsədi aztəminatlı ailələrdən olan bacarıqlı gənclərin universitetlərə hazırlaşmasına dəstək olmaqdır.
Layihənin builki, yəni yeddinci mərhələsi üçün Qaradağ, Kürdəmir, Ucar, Ağdaş, Yevlax, Hacıqabul, Samux və Goranboy rayonlarından 60 nəfər 11-ci sinif şagirdi seçilmişdi. İştirakçıların böyük əksəriyyəti təlim proqramını uğurla başa vuraraq yüksək nəticələr əldə ediblər - 54 nəfər ali təhsil müəssisələrinə, dörd nəfərsə kolleclərə qəbul olub. İştirakçılardan ikisi qəbul imtahanlarında 600-dən yuxarı, dördü isə 500-dən yuxarı bal toplayıb.
Layihə bp və tərəfdaşlarının qonşu icmaların bacarıq və səriştələrinin artırılmasına və sosial inkişafına dəstək olmaq öhdəliyinin bir hissəsidir. Layihənin geniş təlim proqramı iştirakçıların qəbul imtahanlarına hazırlığını təmin edən məşğələlər və fəaliyyətlərə yönəlib. Bundan əlavə, layihə çərçivəsində gənclərə psixoloji dəstək verilir və onların sosial inteqrasiyasına yardım göstərilir.
Bu günədək Qaradağ, Kürdəmir, Ucar, Ağdaş, Yevlax, Hacıqabul, Samux və Goranboy rayonlarının müxtəlif icmalarından olan təxminən 500 aztəminatlı ailə bu layihədən faydalanıb.
Layihənin yeddi mərhələsi ərzində ümumilikdə 542 iştirakçıdan 463-ü – yəni iştirakçıların təxminən 85%-i - ali məktəblərə qəbul imtahanlarının tələblərinə cavab verərək müxtəlif universitetlərdə tələbə adını qazanıb.
Tədbirdə çıxış edən bp-nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli demişdir:
“Bu, bizim sevimli layihələrimizdən biridir və davamlı inkişafı dəstəkləmək məqsədimizə tam uyğundur. İnanırıq ki, bu layihə vasitəsilə istedadlı gənclərimizin öz uğurlu gələcəklərini qurmasına, eyni zamanda onların öz icmalarında həyat keyfiyyətini yaxşılaşdırmasına kömək edirik. Qürur duyuruq ki, bu günə qədər aztəminatlı ailələrdən olan 500-dən çox gəncə universitet tələbəsi olmaq imkanı yaratmışıq. Layihəmizdə iştirak etməklə başladıqları bu yolun onları arzu etdikləri ixtisasa doğru aparacağına ümid edirik.”
7-ci mərhələyə xərclənmiş təxminən 251 000 AZN (148 000 ABŞ dolları) də daxil omaqla layihənin yeddi mərhələsinin birlikdə ümumi dəyəri təxminən 2 milyon AZN-dir (1,2 milyon ABŞ dolları). Hər bir mərhələnin müddəti isə bir ildir.
Layihənin icraçısı “Build Your Future” MMC-dir.
bp şirkəti Azərbaycanda 31 ildir ki, neft və qazın kəşfiyyatı, işlənməsi və nəqli üzrə iri layihələrin əməliyyatçısıdır və bu layihələrin icrasını təhlükəsiz, səmərəli və etibarlı şəkildə həyata keçirir. Bu vaxtadək bp öz tərəfdaşları ilə birlikdə ölkədə icraçısı olduğu layihələrə təxminən 84 milyard dollar sərmayə qoyub. Azərbaycanda biz ən çox töhfə verə biləcəyimizə inandığımız sahələrə yönəlməklə dayanıqlı inkişaf təşəbbüslərinə dəstək vermək öhdəliyi götürmüşük.
bp-nin ölkədə həyata keçirdiyi geniş sosial sərmayə fəaliyyətləri və bacarıqların inkişaf etdirilməsi istiqamətindəki səyləri insanlara əhəmiyyətli faydalar gətirməklə, onların həyatını yaxşılaşdırıb və dəyişdirib.
Şirkətin sosial sərmayələri yerli potensialın yaradılması, təhsil, icmaların inkişafı, yerli sahibkarlıq, ətraf mühit, idman potensialının artırılması, habelə ölkənin zəngin mədəni irsinin tədqiqi və təbliği kimi sahələrə yönəlib. Fəaliyyətə başladığı vaxtdan indiyədək bp özü və onun əməliyyatçısı olduğu birgə layihələrdəki tərəfdaşları adından ölkədəki sosial sərmayə layihələrinə ümumilikdə təqribən 109 milyon ABŞ dolları vəsait xərcləmişdir.
Azərbaycanda bp şirkətində təxminən 2349 Azərbaycan vətəndaşı çalışır və bu da, şirkətin ixtisaslı işçi heyətinin 90 faizindən çoxunu təşkil edir.
bp və tərəfdaşlarının sosial sərmayə layihələri barədə ətraflı məlumat əldə etmək üçün www.bp.com/azerbaijan vebsaytına daxil olun.
Əlavə məlumat üçün:
bp-nin Bakı ofisindəki mətbuat xidmətində Tamam Bayatlıya müraciət edə bilərsiniz.
Telefon: (+994 12) 525 58 95