Bakı. Trend:
Xaçmaz Rayon İcra Hakimiyyətinin başçısı Elnur Rzayev 31 Dekabr
- Dünya Azərbaycanlılarının Həmrəyliyi Günü və Yeni il bayramı
ərəfəsində 2023-cü ilin 19-20 sentyabr tarixlərində Azərbaycan
Respublikasının Silahlı Qüvvələri tərəfindən Qarabağ iqtisadi
rayonunda keçirilən lokal xarakterli antiterror tədbirləri zamanı
yaralanan hərbi qulluqçularımız, Xaçmaz şəhər sakini, Mahmudov
Nəsimi Feyruz oğlunu və Uzunoba kənd sakini, Məmmədov Fərid Faiq
oğlunu yaşadıqları evdə ziyarət edib.
Trend xəbər verir ki, Elnur Rzayev qazilərimizi və ailə üzvlərini
bayram münasibətilə təbrik edib, onların səhhəti və qayğıları ilə
maraqlanıb. İcra başçısı ölkə Prezidenti, Müzəffər Ali Baş Komandan
İlham Əliyevin rəhbərliyi altında Azərbaycan Ordusunun döyüş
meydanında əsl qəhrəmanlıq göstərdiyini, hərbçilərimizin gücü,
cəsarəti sayəsində düşmənin hər zaman məğlub olduğunu, Vətən
uğrunda canından keçən bütün şəhidlərimizin qisaslarının
alındığını, qanlarının yerdə qalmadığını bildirib.
Qazilərimiz onlara göstərilən yüksək diqqət və qayğıya görə
Azərbaycan Respublikasının Prezidenti İlham Əliyev və Birinci
vitse-prezident Mehriban Əliyevaya minnətdarlıqlarını ifadə
ediblər.
Nəsimi Mahmudov lokal xarakterli antiterror tədbirlərdə əsgər,
Fərid Məmmədov isə müddətdən artıq həqiqi hərbi xidmət hərbi
qulluqçusu kimi iştirak edib. Fərid Məmmədov 44 günlük Vətən
müharibəsinin iştirakçısı olub. Döyüşlərdə göstərdiyi şücayətə görə
Azərbaycan Respublikasının Prezidenti İlham Əliyevin sərəncamları
ilə "Azərbaycan Bayrağı" ordeni, “Suqovuşanın azad olunmasına görə”
və "Vətən müharibəsi iştirakçısı" medalları ilə təltif olunub.