Bakı. Trend:
Avtomobil nəqliyyatı ilə yük və sərnişin daşımalarına dair daşıyıcıların qanunvericiliyin tələblərinə və qaydalara riayət etmələrinə nəzarətin həyata keçirilməsi, eləcə də sürücülərin bu sahədə maarifləndirilməsi məqsədilə Azərbaycan Yerüstü Nəqliyyat Agentliyi (AYNA) və Baş Dövlət Yol Polisi İdarəsi (BDYPİ) birgə reyd keçiriblər.
Bu barədə Trend-ə AYNA-dan məlumat verilib.
Bildirilib ki, reyd zamanı daşıyıcıların mülkiyyət, icarə və istifadəsində olan avtonəqliyyat vasitələrinin texniki vəziyyətinin reysqabağı yoxlanılması, sürücülərin reysqabağı tibbi müayinəsinin təşkili, bu sahədə daşımalara icazə verən buraxılış vəsiqəsi və kartlarının mövcudluğu yoxlanılıb.
20 yük nəqliyyat vasitəsi sürücüsündən 2-sinin, 21 sərnişindaşıma təyinatlı nəqliyyat vasitəsinin sürücüsündən isə 9-unun müvafiq sənədlərə malik olduğu müəyyən edilib. 14 sürücüyə bildiriş verilib və onlar reysqabağı texniki yoxlamadan keçirilmə ilə bağlı maarifləndirilib.
Buraxılış kartı və buraxılış vəsiqəsi olmayan 11, sərnişin daşımalarında istifadə olunan formulyarın doldurulmaması ilə bağlı 5-i olmaqla, ümumilikdə 16 sürücü barəsində inzibati xəta haqqında protokol tərtib edilib. Maarifləndirici reydlər davam etdirilir.
Təhlükəsizliyi və şəffaflığı qorumaq, eləcə də qanunvericiliyin tələblərini yerinə yetirmək məqsədilə sərnişin və yük daşmalarını yerinə yetirən daşıyıcılara nəqliyyat vasitələrinin reysqabağı texniki yoxlanılmasını, sürücülərinin isə tibbi müayinəsini həyata keçirmək, sifarişli sərnişindaşıma zamanı formulyar doldurmaq tövsiyə olunur.