Bakı. Trend:
Azərbaycan Yazıçılar Birliyinin “Natəvan” klubunda “Azərbaycanın fədakarlıq məktəbi” seriyasından olan ikinci nəşrin – “Təhlükəsizliyin keşiyində” kitabının təqdimatı keçirilib.
Trend xəbər verir ki, layihə hər il 28 mart tarixində qeyd olunan Azərbaycanın milli təhlükəsizlik orqanları əməkdaşlarının peşə gününə həsr olunub. Kitab seriyası həyatı və xidməti Vətənə sədaqətin, cəsarətin və fədakarlığın parlaq nümunəsinə çevrilmiş insanlara ithaf edilib.
Tədbirin açılışında Azərbaycan Respublikasının Dövlət Himni səsləndirilib, şəhidlərin əziz xatirəsi bir dəqiqəlik sükutla yad olunub.
Axşamın aparıcısı Azərbaycan Yazıçılar Birliyinin katibi, şair və tərcüməçi Salim Babullaoğlu olub. Kitabın müəllifləri yazıçı-publisistlər, xüsusi xidmət orqanlarının veteranları – Elşad Həsənov və Azər Hacıbəylidir. Nəşrin redaktoru Azərbaycan Respublikasının Silahlı Qüvvələr, müharibə və əmək veteranları təşkilatının üzvü Adil Yəhyayevdir.
Qeyd olunub ki, müəllifləri yalnız təhlükəsizlik orqanlarında uzunillik xidmət deyil, həm də tarixi yaddaşın qorunması işinə səmimi sədaqət birləşdirir. Elşad Həsənovun təxminən otuz ilə yaxın, Azər Hacıbəylinin isə təxminən iyirmi beş illik xidmət təcrübəsi var. Peşə fəaliyyətlərini başa vurduqdan sonra onlar Vətənə artıq söz və qələm vasitəsilə xidmət etməyə davam edərək məhsuldar yaradıcılıq əməkdaşlığı qurublar.
“Azərbaycanın fədakarlıq məktəbi” seriyasının ilk kitabı müstəqil Azərbaycanın milli təhlükəsizlik orqanlarının ilk peşəkar operativ əməkdaşlarından biri olan Aydın Rəhimovun həyat və xidmətinə həsr olunub. Yeni nəşr bu mühüm missiyanı davam etdirərək taleyi dövlətin qorunması ilə ayrılmaz şəkildə bağlı olan insanlardan bəhs edir.
“Təhlükəsizliyin keşiyində” kitabının məzmunu onun əsas ideyasını göstərir, üz qabığının bədii tərtibatı isə bu mənanı simvolik şəkildə əks etdirir. Görünməz cəbhənin döyüşçüsü obrazı, qılınc və qələmin simvolik vəhdəti, həmçinin kompozisiyanın mərkəzində yerləşən aypara və səkkizguşəli ulduz Vətənə xidmət ruhunu ifadə edən təsirli və dərin obraz yaradır.
Kitabda Azərbaycanın tarixinin mühüm səhifələrinə və milli xüsusi xidmət orqanlarının formalaşmasına həsr olunmuş məqalələr toplanıb. Nəşrdə Məmmədhüseyn Əsədov, Nadir Həsənov, Cabir Babayev, İlqar Quliyev, Nobel Muradxanov, Seyfulla Qasımov, Aydın Rəhimov və Əziz Rəsulov kimi görkəmli şəxsiyyətlər haqqında materiallar yer alıb. Onların həyat yolu, peşəkarlığı və vəzifə borcuna sədaqəti yeni nəsillər üçün nümunədir.
Tədbirdə çıxış edənlər təhlükəsizlik orqanlarının milli kadrlarının formalaşmasında və ölkənin xüsusi xidmət orqanlarının peşəkar ənənələrinin inkişafında ümummilli lider Heydər Əliyevin xüsusi rolunu vurğulayıblar. Bildirilib ki, bu cür layihələr tarixi yaddaşın qorunması və Vətənin keşiyində şərəf və ləyaqətlə dayanan insanların adlarının tanıdılması baxımından böyük əhəmiyyət daşıyır.
Kitabın təqdimatı dövlətin müdafiəsinə həyatını həsr etmiş insanlara dərin hörmət və ehtiram atmosferində keçirilib. Tədbir iştirakçıları əminlik ifadə ediblər ki, “Azərbaycanın fədakarlıq məktəbi” seriyası bundan sonra da görünməz cəbhənin qəhrəmanlarından bəhs edən, onların qiymətsiz təcrübəsini və mənəvi irsini gələcək nəsillərə çatdıran yeni nəşrlərlə zənginləşəcək.
