Beynəlxalq təşkilatların ekspertləri Qobustan qapalı həbsxanasında monitorinq keçirib
Azərbaycan, Bakı / Trend müxbir K.Zərbalıyeva/ Beynəlxalq təşkilatların ekspertləri çümə axşamı Qobustan qapalı həbsxanasında monitorinq keçirib. Azərbaycan İşgəncələr Əleyhinə Komitəsinin sədri Elçin Behbudov Trend ə bildirib ki, ATƏT-in, Avropa Şurasının, ABŞ, İngiltərə, Almaniya və Norveçin Azərbaycandakı nümayəndəliklərinin ekspertləri ömürlük azadlıqdan məhrum edilmiş bir neçə məhkumla görüşüb, onların saxlandığı kameralara, yeməkxanaya baxış keçiriblər.
Məhkumlar saxlanma şəraitindən, onlara qarşı olan münasibətdən ciddi narazılıq etməyiblər. Məhkumların əsas şikayətləri məhkəmələrin fəaliyyəti ilə bağlı olub. Belə ki, məhkumlar məhkəmələrin qərəzli, ədalətsiz qərar çıxarmalarından, həmçinin onların şikayətlərinin İnsan Haqları üzrə Avropa Məhkəməsinə göndərilməsinə maneçilik yaradılmasından şikayətləniblər.
Həmçinin məhkumlar kameralarına televizor qoyulması ilə bağlı rejim qaydalarına dəyişiklik olunmasını xahiş ediblər. Monitorinq zamanı işgəncə faktı qeydə alınmayıb.
