Bakı. Cani Babayeva - Trend:
İdman gimnastikası üzrə Azərbaycan birinciliyi və Bakı çempionatının təşkili yüksək səviyyədədir.
Bunu Trend-ə kişilər arasında böyüklər kateqoriyasında birinci yer tutmuş Dari Morozov deyib.
Gimnast bildirib ki, öz çıxışından təəssüratları çox yaxşıdır və bundan sonra Şotlandiyada keçiriləcək Avropa çempionatına hazırlaşacaq:
“Avropa çempionatınadək yaxşı forma yığmalıyam. Mənim əksər proqramlarım üzərində işləmək lazımdır, bəzi kombinasiyaları qəlizləşdirmək lazımdır, o zaman mən məmnun olacağam”.
Qeyd edək ki, Milli Gimnastika Arenasında kişi və qadın idman gimnastikası üzrə 25-ci Azərbaycan birinciliyi və Bakı çempionatına start verilib.
İki gün davam edəcək turnirdə ümumilikdə 100-dən çox gimnastın iştirakı gözlənilir.
Yarışlarda qadın idman gimnastları böyüklər, gənclər, yeniyetmələr, uşaqlar, balacalar, kişi idman gimnastları isə böyüklər, gənclər, yeniyetmələr, uşaqlar, balacalar, kiçiklər və balalar yaş qrupunda mübarizə aparacaqlar.