Astana. Trend:
Qazaxıstan prezidenti Kasım-Jomart Tokayev Sloveniyanın Luka-Koper limanının Orta Dəhliz kimi tanınan Transxəzər Beynəlxalq Nəqliyyat Dəhlizinə inteqrasiya oluna biləcəyini bildirib.
Trend xəbər verir ki, bu barədə Sloveniya Prezidenti Nataşa Pirk-Musarla birgə keçirdiyi brifinqdə məlum olub.
Tokayev qeyd edib ki, hər iki tərəf Luka-Koperin Orta Dəhliz layihəsinə daxil edilməsi imkanlarını müzakirə edib və bu məsələ ilə bağlı qarşılıqlı anlaşma əldə edib. O əlavə edib ki, hər iki ölkənin müvafiq qurumlarına qarşılıqlı ticarətin həcminin artırılması üçün konkret addımların atılması tapşırılıb.
Bundan əlavə, prezident Qazaxıstan və Sloveniya arasında ticarət-iqtisadi və investisiya əlaqələrinin genişləndirilməsinə dair sazişi xüsusi qeyd edib.
"Bu gün Qazaxıstan və Sloveniya əczaçılıq, bərpa olunan enerji, maşınqayırma və telekommunikasiya sahələrində mühüm layihələr həyata keçirirlər. Qazaxıstanda 20-yə yaxın Slovakiya şirkəti uğurla fəaliyyət göstərir. Biz həmçinin mədənçıxarma, yaşıl enerji, nüvə sənayesi, rəqəmsallaşma, innovasiya, səhiyyə və turizm kimi sahələrdə yeni layihələr həyata keçirmək barədə razılığa gəldik", - Tokayev deyib.
Qeyd edək ki, Orta Dəhliz regionun bir neçə ölkəsindən keçən və Asiyanı Avropa ilə birləşdirən nəqliyyat və ticarət yoludur. Bu, ənənəvi Şimal və Cənub dəhlizlərinə alternativdir.
Marşrut Çindən başlayır və Qazaxıstan, Özbəkistan və Türkmənistan kimi Mərkəzi Asiya ölkələrindən keçir. Daha sonra Xəzər dənizi, Azərbaycan, Gürcüstan və Türkiyəni keçərək Avropaya çatır. Orta Dəhliz Asiyanın şərq hissələrini, o cümlədən Çini Avropa ilə birləşdirən daha uzun dəniz yollarından yan keçən quru yoludur.