Bakı. Trend:
Xəzərin dibi ilə dərin dəniz kabelinin çəkilməsi layihəsi beynəlxalq maliyyə institutlarının böyük marağına səbəb olub.
Bunu Trend-ə özəl müsahibəsində Qazaxıstanın energetika nazirinin müavini Sunqat Yesimxanov deyib.
Nazir müavini qeyd edib ki, artıq bir sıra banklar hazırlıq işlərinin maliyyələşdirilməsi üçün qrantlar ayırmağa hazır olduqlarını bildiriblər. Onun sözlərinə görə, artıq işin aktiv mərhələsi gedir və məsləhətçilər də fəal iştirak edirlər.
"Bildiyiniz kimi, ötən ilin noyabrında Bakıda keçirilən COP29-da dövlət başçıları tərəfindən müvafiq sazişlər imzalanıb. Hazırda biz fəal təşkilati iş mərhələsindəyik, artıq birgə müəssisələr yaradılıb və iki ölkənin sistem operatorları layihə üzərində işləyirlər. Üç ölkənin hökumətləri arasında sazişlər üzrə danışıqlar aparılır və yaxın vaxtlarda kabelə texniki tələblər hazırlanacaq", - deyə o bildirib.
Kabelin Xəzər regionunda digər enerji layihələri ilə inteqrasiyasına gəlincə, nazir müavini qeyd edib ki, indiyədək layihədə yalnız üç ölkə - Qazaxıstan, Azərbaycan və Özbəkistan iştirak edir və onların hər biri bərabər paya malikdir. Bununla belə, digər Mərkəzi Asiyanın dövlətləri və qlobal enerji bazarının əsas oyunçuları ilə əməkdaşlığın genişləndirilməsi imkanları açıq qalır.
"Biz digər ölkələrdən yaşıl enerjinin cəlb edilməsi ilə bağlı müzakirələrə açığıq. Bu layihənin daha da genişləndirilməsi potensialı var", - deyə Sunqat Yesimxanov qeyd edib.
Bundan əlavə, nazir müavini Azərbaycanla ikitərəfli enerji layihələrinin inkişaf perspektivləri, o cümlədən neft və qaz nəqlinin genişləndirilməsi barədə danışıb:
"Keçən il biz artıq Azərbaycan vasitəsilə Avropaya 1,5 milyon ton neft nəql etmişik, indi isə həcmin 2,5 milyon tona çatdırılmasını müzakirə edirik. Biz qaz dəhlizi üzrə Qazaxıstan qazının nəqlinin həcmini artıracaq layihələri də nəzərdən keçiririk".
S.Yesimxanov qeyd edib ki, bütün layihələr üzrə iş fəal şəkildə davam edir və Qazaxıstan Azərbaycan və regionun digər ölkələri ilə enerji sahəsində əməkdaşlığı genişləndirməyə hazırdır.