Bakı. Trend:
Bu ilin mart ayı ərzində “biletim.az” portalı vasitəsilə onlayn qaydada 71 773 bilet əldə edilib.
Trend bu barədə AYNA-ya istinadən xəbər verir.
Qeyd edilir ki, bu, ötən ilin müvafiq dövrü ilə müqayisədə 2,1 dəfə çoxdur. Sevindirici haldır ki, artıq sərnişinlər səfərlərini reallaşdıran zaman onlayn bilet almağa üstünlük verirlər.
Qeyd edilir ki, “biletim.az” portalında 51 şəhər və rayona, 80 istiqamət üzrə bilet almaq mümkündür. Sistemə 311 reys olmaqla 357 nəqliyyat vasitəsi qoşulub. Onlayn bilet satışı sistemi mərhələli şəkildə sərnişindaşıma sahəsində xidmət göstərən bütün daşıyıcı və avtovağzalları əhatə edəcək.
Portal vaxta qənaət, müştəri məmnuniyyətinin təmin edilməsi, ölkədə nağdsız ödəniş dövriyyəsinin artırılması baxımından bir sıra üstünlüklərə malikdir.
Bilet əldə etmək üçün sərnişinlər “biletim.az” saytına daxil olmalı və qeydiyyatdan keçməlidirlər. Mobil cihazlar üçün “Biletim” mobil tətbiqini “App Store” və “Google Play”dən yükləmək mümkündür.