Bakı. Trend:
Azərbaycanın qabaqcıl investisiya şirkəti olan PAŞA Kapital 23 may 2025-ci il tarixində yerli maliyyə sektorunun inkişafına mühüm töhfə verən “Maliyyə İnvestisiya Forumu”nun təşkilinə sponsor olaraq dəstək göstərib. Forum, “İnvestor olmaq asandır” şüarı ilə Azərbaycan Kapital Bazarları Assosiasiyası (AKBA) və “Facemark” şirkətinin birgə təşkilatçılığı ilə həyata keçirilib.
Kapital bazarlarının institusional inkişafı, investorlar üçün
əlverişli mühitin formalaşdırılması, alternativ maliyyələşmə
alətlərinə dair məlumatlılığın artırılması və digər mühüm mövzulara
həsr olunmuş forumda “İnvestisiyanın gücü və yeni
trendlər”, “Uğurlu investisiya qərarları” adlı iki panel
müzakirələri təşkil edildi.
"İnvestisiyanın gücü və yeni trendlər" mövzusunda
keçirilən ilk paneldə spiker kimi iştirak edən PAŞA Kapital
İnvestisiya Şirkətinin direktoru Ceyhun Hacıyev texnoloji
innovasiyalar və yeni maliyyə alətlərinin bazara inteqrasiyasının
önəmini vurğulayıb.
20 ilə yaxın zəngin təcrübəsini forum iştirakçıları ilə paylaşan Ceyhun Hacıyev, investisiya proseslərinin rəqəmsallaşdırılması və texnoloji platformaların istifadəsinin investorlara vaxt və əlçatanlıq baxımından fayda verdiyini qeyd edib, həmçinin "Şirkətimiz rəqəmsallaşma dövrünün tələblərinə çevik şəkildə uyğunlaşır, investorların ehtiyacına əsasən PAŞA Kapital ticarət platformasını davamlı olaraq təkmilləşdirir. Məhz bunun nəticəsidir ki, ticarət platformamız bu gün peşəkar treyderlər üçün sadə interfeysli, etibarlı və geniş funksional imkanlara malikdir." deyə əlavə edib.
Forumun sonunda keçirilən stimullaşdırıcı lotoreya çərçivəsində, 3 tədbir iştirakçısı təsadüfi seçim əsasında PAŞA Kapital-dan hədiyyə olaraq “Glensol” istiqrazlarına sahib olub.
Maliyyə İnvestisiya Forumu yalnız müzakirə və bilik mübadiləsi platforması kimi deyil, eyni zamanda bazar iştirakçıları arasında strateji tərəfdaşlıqların qurulmasına və ölkənin investisiya ekosisteminin gücləndirilməsinə yönəlmiş funksional və perspektivli bir təşəbbüs kimi dəyər qatıb.
PAŞA Kapital İnvestisiya Şirkəti haqqında daha ətraflı məlumat üçün 1548 nömrəsi ilə əlaqə saxlaya və ya https://www.pashacapital.az/ saytına daxil ola bilərsiniz.
