Bakı. Trend:
Multimodal daşımalar və təchizat zəncirlərinin idarə edilməsi ilə məşğul olan Almaniyanın “Rhenus Logistics” beynəlxalq logistika qrupu Türkiyə, Cənubi Qafqaz və Mərkəzi Asiyanı əhatə edən uzunmüddətli regional strategiyası çərçivəsində Orta Dəhliz boyunca fəaliyyətini tədricən genişləndirir.
Bunu Trend-ə müsahibəsində “Rhenus Logistics”in nümayəndəsi bildirib.
Şirkətdən verilən məluamta görə, Azərbaycan bu dəhlizdə həm tranzit ölkə, həm də Asiya ilə Avropanı birləşdirən, inkişaf edən logistika mərkəzi kimi mərkəzi rol oynayır. Xüsusilə, Bakı Limanı və onun infrastrukturu dəhlizin əsas elementlərindən biridir və “Rhenus Logistics” bu dəyişiklikləri diqqətlə izləyir, ölkədə investisiya imkanlarını qiymətləndirir.
“Rhenus Logistics” Transxəzər Dəhlizi boyunca logistika şəbəkəsini gücləndirir
2024-cü ildə Bakıda nümayəndəliyini hüquqi şəxsə çevirdikdən sonra, “Rhenus” ölkə üzrə bir sıra yeni investisiya layihələrini nəzərdən keçirməyə başlayıb. Bunlar arasında hazırda qiymətləndirmə mərhələsində olan liman logistikası ilə bağlı layihə də var və
“Hazırda konkret detalları açıqlamaq mümkün deyil, lakin təşəbbüs Rhenus qrupunun Azərbaycanda multimodal və dəniz əlaqələrini gücləndirmək niyyətini əks etdirir. Layihə analiz mərhələsindədir və yoxlama başa çatdıqdan sonra növbəti addımlar müəyyən ediləcək.
Fərdi layihələrlə yanaşı, “Rhenus” dəniz, dəmir yolu və avtomobil nəqliyyatını effektiv və davamlı şəkildə birləşdirən inteqrasiya olunmuş multimodal həllərin hazırlanmasına hədəflənib. Bu, yükaşırma məntəqələrinin modernləşdirilməsini, yeni anbarların yaradılmasını və gömrük, liman və dəmir yolu proseslərinin rəqəmsal inteqrasiyasını əhatə edir”, - deyə şirkətdə bildirilib.
“Rhenus Logistics” müştərilər, tərəfdaşlar və dövlət orqanları ilə sıx əməkdaşlıq edir və real tələb olan sahələrdə investisiya qoyur, məqsəd isə Azərbaycanın iqtisadi inkişafını dəstəkləmək və Transxəzər Dəhlizi boyunca etibarlı və dayanıqlı logistika infrastrukturu yaratmaqdır.
Azərbaycan multimodal təchizat zəncirində əsas körpü kimi
“Transxəzər dəhlizi qlobal tədarük zəncirləri üçün strateji şaxələndirmə və dayanıqlılığı təmin edir. O, Çin, Mərkəzi Asiya və Avropanı Xəzər dənizi vasitəsilə birləşdirən alternativ marşrut təqdim edir, şimal marşrutlarından asılılığı azaldır və tranzit vaxtını daha proqnozlaşdırıla bilən edir. Bir çox yük göndərənlər üçün bu, geosiyasi risklərdən asılı olmadan fəaliyyət göstərmək və dəyişən şəraitdə nəqliyyatın fasiləsizliyini təmin etmək imkanıdır.
Azərbaycan Asiya və Avropa arasında körpü kimi mərkəzi rol oynayır. Potensial böyükdür: ölkə artıq səmərəli multimodal əlaqələr qurmaq qabiliyyətini nümayiş etdirib. Məsələn, Bakıya gələn yük dəmir yolu vasitəsilə Gürcüstana və oradan Qara dənizə və ya Türkiyəyə bir neçə saat ərzində göndərilə bilər ki, bu da şimal marşrutları ilə müqayisədə vaxta əhəmiyyətli dərəcədə qənaəti təmin edir", – deyə “Rhenus Logistics” nümayəndəsi vurğulayır.
Bu səmərəlilik dəhlizi ticarətin şaxələndiirlməsi və Avrasiya regionunda logistikanın dayanıqlılığının gücləndirilməsi üçün getdikcə daha cəlbedici edir.
"Ancaq marşrut infrastruktur və əməliyyat problemləri ilə üzləşir, məsələn, infrastrukturun parçalanmış olması və dar məntəqələrin mövcudluğu. Bir çox yerlərdə müasir terminallar, intermodal mərkəzlər və koordinasiya olunmuş sərhəd-keçid prosesləri mövcud deyil ki, bu da tranzit vaxtının uzanmasına səbəb ola bilər.
Texniki çətinliklər də qalır: dəmir yolunun rels genişliyində fərqlər, məhdud hərəkət qabiliyyətli vaqon parkı və böyük şəhərlər arasındakı məsafələr əməliyyatların planlaşdırılmasını çətinləşdirir. Bundan əlavə, milli qanunvericilik aktları, tarif sistemləri və inzibati prosedurlardakı fərqlər irəliləyişi ləngidir və daha sıx regional əlaqələndirməni tələb edir. Yük göndərənlərin marşrut boyunca proqnozlaşdırıla bilmə və şəffaflıqla bağlı artan gözləntiləri eyni dərəcədə önəmlidir",- deyə şirkətdən qeyd ediblər.
Nəticə etibarı ilə, Transxəzər dəhlizinin əsas üstünlükləri əlaqəlilik, proqnozlaşdırıla bilmə və şaxələndirmədir. Əsas vəzifə bu güclü tərəfləri tam uyğun, etibarlı və iqtisadi cəhətdən rəqabətədavamlı logistika marşrutuna çevirməkdir – bu, “Rhenus”un uzunmüddətli sərmayələr, yerli əməkdaşlıq və texniki ekspertiza vasitəsilə hədəflədiyi məqsəddir.
“Rhenus Logistics”in Çin–Azərbaycan–Avropa marşrutu üzrə yükdaşıma həcmləri ilə bağlı proqnozu
“Şirkət Çin–Azərbaycan–Avropa marşrutu üzrə yükdaşımalar həcminin yüksək və dayanıqlı artım potensialını görür. Qlobal təchizat zəncirlərinin şaxələndirilməsi və şirkətlərin daşımalar üçün daha dayanıqlı həllər axtarması ilə Transxəzər dəhlizi ehtiyat variantından əsas ticarət marşrutuna çevrilib.
Son iki ildə Transxəzər marşrutu üzrə konteyner trafiki ildə təxminən 35–40% artaraq 2024-cü ildə 3,2 milyon tona çatmışdır, bu da 2022-ci ildəki 1,5 milyon tonla müqayisədə əhəmiyyətli artım deməkdir. Bakı, Aktau və Kurık kimi əsas hablara davamlı investisiyalar və Qazaxıstan, Azərbaycan və Gürcüstan arasında dəmir yolu əlaqələrinin təkmilləşdirilmiş koordinasiyasını nəzərə alsaq , 2030-cu ilə qədər yük daşımaları həcminin ikiqat artacağı gözlənilir”,- deyə “Rhenus Logistics” nümayəndəsi qeyd edir.
Liman və dəmir yolu infrastrukturunun əlavə inkişafı ilə yanaşı effektiv multimodal koordinasiya yaxın illərdə yükdaşıma həcminin artımını stimullaşdırmağa davam edəcək.
“Rhenus”un regionda və əsas terminallarda aktiv fəaliyyəti şirkətə bu artımı dəstəkləməyə və dəhliz boyunca etibarlı, dayanıqlı logistika həlləri təqdim etməyə imkan verir.
“Rhenus Logistics” Transxəzər dəhlizinin rəqəmsallaşmasını gücləndirir
“Rəqəmsallaşma “Rhenus” qrupunun logistika strategiyasının əsas elementidir, bu, qrupun həm Azərbaycandakı, həm də bütün Transxəzər dəhlizi boyunca fəaliyyətini əhatə edir. Perspektivli istiqamətlərdən biri, gömrük, liman və dəmir yolu strukturlarını vahid platformada birləşdirən dəhliz idarəetmə sistemlərinin tətbiqidir.
Belə sistemlər çatışmazlıqların qarşısını almağa, proseslərin real vaxtda görünməsini təmin etməyə və daha səmərəli keçid qabiliyyətinin planlaşdırılması üçün proqnozlaşdırıcı analitikadan istifadə etməyə kömək edir”, – deyə şirkətdən bildiriblər.
“Şirkət bu təcrübəni regionda tətbiq etməklə, yüklərin emal vaxtını və xərcləri azaltmaq,və beləcə Transxəzər marşrutunu alternativ marşrutlarla müqayisədə daha rəqabətqabiliyyətli etmək niyyətindədir.
Rəqəmsallaşma dayanıqlılıqla sıx bağlıdır. “Rhenus” 2015-ci ildən Azərbaycanda fəaliyyətə başladığından, şirkət xidmət spektrini avtomobil daşımalarından dəmir yolu komponentli multimodal xidmətlərə genişləndirərək emissiyaları azaldıb və güc imkanlarının səmərəli istifadəsini artırıb.
Bakıda keçirilən COP29 çərçivəsində “Rhenus” ekoloji təmiz elektrik yük maşını ilə yerli logistika əməliyyatlarını dəstəkləyərək əyani olaraq nümayiş etdirib ki, praktik innovasiyalar daha təmiz və səmərəli logistikaya töhfə verir”, – deyə “Rhenus Logistics” nümayəndəsi yükunlaşdırıb.