Bakı. Trend:
Orta Dəhliz getdikcə daha çox Rusiya üzərindən keçən “Şimal dəhlizi”nə və Süveyş kanalı vasitəsilə və ya Afrika ətrafından keçən dəniz marşrutlarına alternativ kimi - həyat qabiliyyətli və siyasi baxımdan dayanıqlı bir seçim kimi qiymətləndirilir.
Bu barədə Trend “The New Lines Institute” beyin mərkəzinə istinadən məlumat verir.
“2030-cu ilədək TITR üzrə yük axınlarının həcmi üç dəfə və daha çox arta bilər. Təkcə 2024-cü ildə TITR-in Qazaxıstan hissəsində konteyner daşımaları 62 faiz artaraq 4,5 milyon tona çatıb. Hakimiyyət növbəti üç il ərzində bu göstəricini iki dəfə artırmağı planlaşdırır.
2025-ci ilin iyul ayında Qazaxıstanın dövlət dəmir yolu şirkəti KTZ ilə “China State Railway Group” arasında əməkdaşlıq sazişinin yenilənməsi Orta Dəhlizin gücləndirilməsi və Qazaxıstan üzərindən Çinlə Avropa arasında daşımaların həcminin artırılması istiqamətində strateji öhdəliyi vurğulayır”, – hesabatda bildirilir.
Məlumata əsasən, ötürücülük qabiliyyətinin artması və yüksək səviyyəli siyasi dəstək tələbin təkcə artmadığını, həm də bunun bir struktur xarakter daşıdığını göstərir və Qazaxıstan üzərindən keçən şərq-qərb dəhlizinin əsas ticarət arteriyasına çevrildiyini təsdiqləyir.
Qeyd edək ki, Orta Dəhliz regionun bir sıra ölkələrindən keçən, Asiya ilə Avropanı birləşdirən nəqliyyat və ticarət marşrutudur. Bu, ənənəvi Şimal və Cənub dəhlizlərinə alternativdir.
Marşrut Çindən başlayır və Qazaxıstan, Özbəkistan və Türkmənistan kimi Mərkəzi Asiya ölkələrindən keçərək, Xəzər dənizi, Azərbaycan, Gürcüstan və Türkiyədən keçərək Avropaya çatır. Orta Dəhliz Asiyanın şərq bölgələrini, o cümlədən Çini Avropa ilə birləşdirən, daha uzun dəniz yollarından yan keçməklə quru yolu təklif edir.