Azərbaycan, Bakı, 17 yanvar/ Trend , müxbir İ.Xəlilova/ Azərbaycanın Vergilər Nazirliyinin xüsusi rejimli vergi xidməti Departamenti 2007-ci ilin yekunlarına görə, proqnoz tapşırıqlarını 103% yerinə yetirib. Bu barədə departamentin rəhbəri Sahir Məmmədxanov məlumat verib.
Ötən illərlə müqayisədə, Azərbaycan Dövlət Neft Şirkəti nəzərə alınmadan, iri vergi ödəyiciləri xətti ilə dövlət büdcəsinə 100 mln. manatdan çox vəsait keçirilib. "Azərenerji", "Azəriqaz", ADDY, "AzAl" DK, XDG, Bakımetropoliten, "Azərkimya" DŞ, "Azərsu" SC, Rabitə nazirliyindən vergi ödəmələri 230 mln. manatı ötüb.
Məmmədxanovun sözlərinə görə, ARDNŞ xətti ilə 1,15 mlrd. manat (gəlir vergisi nəzərə alınmaqla) vergi keçirilib. Dövlət Neft Şirkəti tərəfindən yaradılmış vergi borcunun sıfıra endirilməsi əhəmiyyətli faktdır.Hazırda onun vergi üzrə borcu yoxdur. Üç il əvvəl ARDNŞ-nin borcları 1 mlrd. Manata yaxın idi.
Digər iri vergi ödəyicilərinin borcları 750 mln. manatı ötür və bunun əsas hissəsi "Azərenerji"-nin payına düşür. Buna baxmayaraq, departament rəhbəri ötən illərlə müqayisədə, "Azərenerji" tərəfindən ödəmələrin artdığını hesab edir. 2006-cı ildə SC-nin vergi ödəmələri 50 mln. manat təşkil edirdisə, ötən il bu rəqəm 80 mln. manatı ötüb.
2008-ci ildə Dövlət Neft Şirkəti üçün vergi ödəmələri üzrə proqnozlar 1,35 mlrd. manat səviyyəsində müəyyən edilib.
"Ötən il AzAl, XDG, "Azəriqaz" , Rabitə nazirliyinin xəzinəyə əlavə vergiləri ödəmələrini nəzərə alaraq, 2008-ci ildə qalan doqquz iri vergi ödəyiciləri üçün 250 mln. manatdan çox proqnoz qoyulub", -Məmmədxanov bildirib. O, bu il bu proqnozların təmin ediləcəyinə əmindir.