Azərbaycan, Gəncə, 26 fevral/ Trend , müxbir V.Məmmədov / Gəncə şəhərində İran istehsalı olan qaz sobalarının satışına qadağa qoyulub, - çərşənbə günü İqtisadi İnkişaf Nazirliyi yanında İstehlak Bazarına Nəzarət Dövlət Xidmətinin Gəncə-Qazax sbölməsinin müdiri Eldar Növəliyev deyib.
"İnsan səhhəti üçün təhlükəli olan bu sobalar tamamilə satışdan çıxarılıb", - o deyib.
Gəncə şəhər Təcili və Təxirəsalınmaz Tibbi yardım stansiyasının baş həkimi Namiq Nəbiyevin verdiyiy məlumata görə, son 2 ayda Gəncədə İran sobalarından istifadəyə görə 5 zəhərlənmə faktı qeydə alınıb ki, nəticədə, bir nəfər dünyasını dəyişib.
Yanvarda Azərbaycanda dəm qazı ilə əlaqədar 40 hadisə qeydə alınıb, bu da 2007-ci il ərzində analoji hadisələrin ümumi sayının, demək olar ki, üçdə birini təşkil edir. Dəm qazından zəhərlənmə nəticəsində 16 nəfər ölüb.
"Azəriqaz" QSC-nin rəhbəri Əlixan Məlikov abunəçilərin qaz cihazlarından istifadəsinin standartlara uyğunsuzluğunun müəyyən edilməsi haqqında əmr verib.
Gəncə paytaxt Bakıdan 365 kilometr qərbdə yerləşir.