Azərbaycan, Bakı, 15 may / Trend , müxbir İ. Xəlilova / BMT-nin Ümumdünya Ərzaq Proqramının ("World Food Program WFP") Azərbaycanda fəaliyyətinin başa çatması 2008-ci il iyun 30 - da dövlət səviyyəsində qeyd olunacaq. Bu haqda Baş nazirin müavini, qaçqın və məcburi köçkünlərlə iş üzrə Dövlət Komitəsinin başçısı Əli Həsənov cümə axşamı bildirib.
"Proqramın 15 il ərzində davam etməsi "WFP"-nin təcrübəsində presedentsiz hadisədir. Belə ki, heç bir münaqişə zonasında sözügedən proqram bu qədər uzunmüddətli olmayıb, - Həsənov qeyd edib. - Məcburi köçkünlərin probleminin həssaslığını nəzərə alaraq, ölkə başçısının xahişilə proqramın fəaliyyət müddəti üç dəfə uzadılıb".
Onun sözlərinə görə, "WFP" Azərbaycandakı fəaliyyətini hələ 1999-cu ildə dayandırmağı planlaşdırırdı.
1994-2008-ci illər ərzində ÜƏP 500 min insana 164 min ton, ümumi dəyəri 115 mln.$-lıq ərzaq yardımı ilə təmin edib. Məcburi köçkün adambaşına ayda 6 kq buğda unu, 0,6 litr yağ, 450 qr qənd və 150 qr duz yardımı alırdı.
Proqram fəaliyyətini başa çatdırsa da, Azərbaycan höküməti ərzaq təhlükəsizliyi tədbirləri çərçivəsində, əhalinin aztəminatlı təbəqəsi üçün sosial yardımın (ərzaq alınması üçün) miqdarını artıracaq.
"Bu qərar dövlət başçısının təşəbbüsü ilə qəbul olunacağı üçün, məcburi köçkünlər üçün nəzərdə tutulan sosial yardımın həcmi ölkə prezidentin müvafiq fərmanından sonra açıqlanacaq", - Baş nazirin müavini əlavə edib.
Dünyanin iri humanitar təşkilatı olan ÜƏP 1963-cü ildə BMT-nin sistemində ərzaq yardımı orqanı qismində təsis edilib. Təşkilatın məqsədi aclıq və yoxsulluqla mübarizə aparmaq, inkişaf etməkdə olan ölkələrdəki yoxsullara yardım etməkdir. "WFP"-nin Azərbaycan üzrə təmsilçisi Linn Miller (Linn Miller) bu həftə bildirib ki, ərzaq məhsullarının dünya üzrə qiymətinin artımı bütün ölkələrdə, həmçinin, Azərbaycanda yoxsulluq dərəcəsinin artmasına gətirib çıxardacaq.
"Dünya Bankının hesablamalarına görə, qiymət artımı fonunda hazırda əlavə olaraq 100 mln. insan yoxsulluq həddindədir. Heç bir ölkə bundan qaça bilməz", - Linn Miller əlavə edib.
Bu səbəbdən "WFP" donorlardan əlavə vəsait üçün 800 mln.$ istəyib. Bundan əlavə, BMT-nin Ərzaq və Kənd Təsərrüfatı təşkilatı ("FAO") və Kənd Təsərrüfatının Beynəlxalq İnkişaf Fondu ("İFAD") yardıma ehtiyacı olan ölkələrin hökümətlərilə birgə, yoxsulluq dərəcəsini azaltmaq məqsədilə, ərzaq istehsalının artırılması yollarını axtaracaq.
Müəlliflə əlaqə saxlamaq üçün elektron ünvan: [email protected]
