Azərbaycan, Bakı, 04 iyul / Trend , müxbir İ.Xəlilova/ Azərbaycanda iqtisadiyyatın inkişaf tempi, dünya böhranına baxmayaraq, 2008-ci ilin yekunu üzrə ikirəqəmli səviyyədə qalacaq və ölkə dünyada iqtisadi temp üzrə lider mövqeyini saxlayacaq. Bu barədə cümə günü Bakıda keçirilən Azərbaycan-Çexiya biznes-forumunda Azərbaycanın iqtisadi inkişaf naziri Heydər Babayev bildrib.
Son dörd ildə, 2004-cü ildən 2007-ci ilədək, ölkə iqtisadiyyatı 96 faiz artıb.
"Biz iqtisadi potensialı ikiqat artırmaq, güclü iqtisadi bazada yüksək tempi saxlamaq və iqtisadi inkişafı davam etdirməyə müvəffəq olmuşuq. Əlbəttə , bütün bu vəzifələr heç də asan deyil", - deyə nazir hesab edir.
Cari ilin birinci rübünün yekunları üzrə ÜDM təxminən 14 faiz artıb və ilkin məlumatlara görə, analoji temp birinci yarımilin yekunu üzrə də gözlənilir. Babayev hesab edir ki, ÜDM-in artım tempinin aşağı düşməsi (2007-ci ildə ÜDM 25 faiz, 2006-cı ildə isə, 34,5 faiz təşkil edib) müsbət dəyişikliklərə dəlalət edir ki, nəticədə, bu göstəricinin yaxın gələcəkdə daha aşağı səviyyədə stabilləşdirilməsi mümkün olacaq.
Nazir, həmçinin, bildirib ki, Azərbaycan hökuməti tərəfindən aparılan islahatlar sayəsində, qısa müddət ərzində regionların sosial-iqtisadi inkişafı təmin olunub. Son beş ildə 650 mindən çox iş yeri açılıb. Bunun nəticəsində ölkədə yoxsulluq səviyyəsi minimal səviyyəyə enib, işsizlik səviyyəsi bir faiz təşkil edib.
"Hazırda bir neçə yekun hesablamalar aparılır, bunların nəticələrinə görə, real göstərici bundan da aşağı ola bilər", - deyə nazir bildrib.
İyulun 4-nə olan rəsmi məzənnə 0,8097 AZN/USD təşkil edib.
Məqalə müəllifi ilə əlaqə ünvanı: [email protected]
