Azərbaycan, Bakı, 22 oktyabr/ Trend , müxbir Ü.İsmayılova, E.İsmayılov/ "Akkord Şirkətlər Qrupu ilin sonuna Bakı - Quba - Rusiya sərhədi avtomagistralının beton hissəsini istismara verəcək", - şirkətin nümayəndəsi Afaq Quliyeva çərşənbə günü bildirib.
"Demək olar ki, işlərin 80 faizi artıq başa çatdırılıb və ilin sonuna bu yolun bizim tikdiyimiz 120 kilometrlik beton hissəsi təhvil veriləcək", - Quliyeva bildirib.
Bakı - Quba - Rusiya sərhədi yolunun beton hissəsinin tikintisi Avropa Yenidənqurma və İnkişaf Bankının maliyyə dəstəyi ilə həyata keçirilir. Avtomagistralın ümumi uzunluğu 208 kilometrdir. Yenidənqurmadan sonra yolun uzunluğu 198 kilometrədək azalacaq. Beton yolun tikintisi avtomagistralın 16-134 kilometrlərində həyata keçirilir.
Bu layihənin ilkin dəyəri 400 mln. dollar olsa da, beton yolun çəkilməsi haqqında qərarın qəbul edilməsi layihənin 800 mln. dollaradək bahalaşmasına gətirib.
Çəkilən yol sahəsi boyunca 21 körpü və 10 yol qovşağının tikintisi nəzərdə tutulur. Bu istiqamətdə yük daşınmalarının həcmi çox olduğundan, beton örtüyün qalınlığı 28 sm -dir.
Müəlliflə əlaqə saxlamaq üçün elektron ünvan: [email protected]
