Azərbaycan, Bakı, 01 noyabr/ Trend , müxbir Ü.İsmayılova/ Dünya maliyyə böhranı sığorta bazarına ciddi təsir göstərməsə də, belə risk hələ də mövcuddur. Dünyanın müxtəlif bölgələrindən olan sığortaçılar Azərbaycan Sığortaçılar Assosiasiyasının nümayəndələrinin də iştirakı ilə Almaniyada keçirilən görüşdə belə rəyə gəliblər, - assosiasiyanın icraçı direktoru Qafar Məcidov şənbə günü bildirib.
"Dünya maliyyə böhranının sığortaya təsiri məsələsi Almaniya və Rusiya sığortaçılarının illik görüşündə əsas müzakirə mövzusu olub", - Məcidov bildirib. Görüş ilk dəfə olaraq geniş formatda keçirildiyi üçün Azərbaycan sığortaçıları da bu görüşə qatılıblar.
Onun sözlərinə görə, görüşdə Ukrayna, Belarus və digər ölkələrin sığorta birliklərinin, həmçinin ictimai təşkilatların nümayəndələri və müxtəlif universitetlərdən olan professorlar iştirak ediblər.
Dünya maliyyə böhranının Azərbaycanın sığorta bazarına təsiri isə cüzi olub. "Standard Insurance" sığorta şirkətinin Baş direktor müavini Aydın Rəhmanov bildirib ki, Azərbaycanda öz bizneslərini yalnız girov əmlakının kreditləşdirilməsinin sığortası üzərində quran şirkətlərə zərər dəyb. Belə ki, Azərbaycanın bankları avqsustdan istehlak kreditləşdirməsini, eləcədə avtomobil kreditlərinin verilməsini demək olar ki, dayandırıblar.
Bankların istehlak kreditləşdirməsini dayandırması nəticəsində ölkənin avtomobil bazarında satış həcmi xeyli azalıb. Belə ki, alqı-satqı üzrə əməliyyatların təxminən 80 faizi kreditləşdirmə yolu ilə həyata keçirilir. "Sığorta fəaliyyəti haqqında" Qanuna əsasən, avtomobillər mütləq surətdə OSAQO sığorta polisi üzrə sığorta edilməlidir ki, bu da portfelin böyük hissəsini təşkil edir və sığorta bazarının artımına səbəb olur.
Azərbaycan Maliyyə Nazirliyinin Dövlət Sığorta Nəzarəti şöbəsinin rəhbəri Namiq Xəlilovun sözlərinə görə, əksər şirkətlər öz bizneslərini sığorta bazarının təxminən 30 faizini təşkil edən avtomobil sığortası sahəsində inkişaf etdirirlər. Bununla əlaqədar, bazar ilin sonuna 30-35 faiz səviyyəsində proqnozlaşdırılan artım gözləmələrini doğrultmayacaq.
Müəlliflə əlaqə saxlamaq üçün elektron ünvan: [email protected]