Azərbaycan, Bakı, 08 oktyabr / Trend /
İranda "Ərak-Pars Vaqon" zavodunun əməkdaşları bir gün öncə əməkhaqqılarının ləngiməsi ilə əlaqədar mitinq keçiriblər. Bu barədə İranın IRNA agentliyi xəbər verib.
Məlumata əsasən, zavod əməkdaşları artıq iki aydır ki, əmək haqqı almırlar. "Zavodda 1500 əməkdaş işləyir. İki ay ərzində onlar maddi çətinlik çəkir", - məlumatda deyilir.
"İndiyə kimi biz müvafiq təşkilatların rəhbərlərinə şikayət etmişik, onlarla görüşmüşük. Lakin hələ heç bir cavab almamışıq", - agentliyin bildirdiyi kimi, "Ərak-Pars Vaqon" zavodunun işçilər komitəsinin üzvü Məhəmmədrza Haşimi bildirib.
Haşimi müvafiq orqanlardan əməkdaşların əməkhaqqılarının tez bir zamanda ödənilməsini tələb edib.
"Ərak-Pars Vaqon" zavodu dəmiryol məhsullarının istehsalı üzrə böyük zavodlardan biridir. Zavodda yük və sərnişin vaqonları, lokomotivlər və metro vaqonları istehsal olunur.