Azərbaycan, Bakı, 03 noyabr / Trend , müxbir Ü.İsmayılova/
Beynəlxalq Daşınmaz Əmlak Fondu və ABŞ-ın Milli Rieltorlar Təşkilatı Bakı Rieltorlar Assosiasiyasına 30 min dollar həcmində qrant ayırıb. B u barədə assosiasiyanın icraçı direktoru Elnur Azadov çərşənbə axşamı deyib.
"Qrant inzibati məsələlərin həllində istifadə olunacaq", - Azadov deyib.
Onun sözlərinə görə, qrant razılaşması çərçivəsində Azərbaycanın daşınmaz əmlak bazarının iştirakçıları üçün xüsusi kurslar və treninqlər keçiriləcək.
International Real Property Foundation (IRPF) - Beynəlxalq Daşınmaz Əmlak fondu 1992-ci ildə Mərkəzi, Şərqi Avropa və MDB dövlətlərində plan iqtisadiyyatından sərbəst bazar münasibətlərinə keçid dövründə kömək göstərilməsi məqsədilə müstəqil qeyri-hökumət təşkilatı kimi təsis edilib.
National Association of Realtors (NAR) - ABŞ Milli Rieltorlar Təşkilatı 1908-ci ildə Çikaqoda (İllinoys) Milli Əmlak Birjası Assosiasiyası kimi yaradılıb. Təşkilat öz üzvlərinə daha çox mənfəət və uğur əldə etmək üçün kömək edir. Hazırda təşkilatın sıralarında 1,2 milyon üzv və 1,4 mindən çox yerli assosiasiya var.
Hazırda Bakı Rieltorlar assosiasiyasının 60 hüquqi və fiziki şəxsdən ibarət üzvü var. Hüquqi şəxslər üçün üzvlük haqqı 300 manat, fiziki şəxslər üçün isə 150 manatdır.
2008-ci ilin oktyabrında assosiasiya Azərbaycan Ədliyyə Nazirliyində qeydiyyatdan keçib.
Assosiasiyanın əsas məqsədi Azərbaycanda rieltor fəaliyyəti standartlarının müəyyənləşdirilməsi, xüsusi peşəkar hazırlıq mərkəzinin yaradılması, həmçinin rieltorların sertifikasiya sisteminin tətbiqidir.
Məqalə müəllifi ilə əlaqə ünvanı: [email protected]
