Azərbaycan, Bakı, 07 noyabr / Trend , müxbir Ü.İsmayılova/
Trend -ın "Baltika Pivə Şirkəti" ASC-nin korporativ məsələlər üzrə vitse-prezidenti Daniil Briman ilə müsahibəsi
- Ötən yay mövsümündə "Baltika-Bakı"nın işini necə qiymətləndirirsiniz?
- Bu ilin doqquz ayı ərzində fəaliyyətin yekunlarına əsasən, Azərbaycanda "Baltika" məhsullarının satışı cüzi şəkildə - təxminən bir faiz yarım azalıb. Lakin bu dövr ərzində 11 faiz azalan ölkənin ümumi pivə bazarını qiymətləndirsək, bu çox azdır. Azərbaycanda pivə istehlakının azalmasına səbəb üç əsas amil olub:
- birinci və ən əsası - qlobal maliyyə böhranının təsiri. Belə ki, pivə geniş istifadə olunan məhsullara aiddir və dəyişikliyə reaksiya verən sürətli indikatordur.
- ikinci amil - mövsümilikdir. Azərbaycanda bu il yay nisbətən soyuq keçib, pivə isə mövsümi sərinləşdirici içkidir ki, bu amil də satış həcminə öz mənfi təsirini göstərib. Yayda pivə qış dövrünə nisbətən 10 dəfə çox satılır, yay satışlarını il ərzindəki satışın ümumi həcminin 80 faizi dəyərində qiymətləndirmək olar.
- sonuncu amil isə - dini Ramazan bayramıdır. Bu il bayram avqustda oldu və bu zaman əhali arasında pivə istehlakı əhəmiyyətli dərəcədə azaldı.
Bütün bunlar Azərbaycanda pivə bazarının həcminə təsir göstərən üç əsas parametrdir.
- "Baltika-Bakı" məhsullarının Azərbaycanda bazar payı necədir və zavodun yaxın gələcəkdə hansı proqnozları var?
- Hazırda Azərbaycanın pivə bazarında "Baltika-Bakı"nın bazar payı 73 faiz təşkil edir. Bu bazarın böyük inkişaf potensialı var, belə ki, ölkə iqtisadiyyatı stabildir. Azərbaycan qlobal maliyyə böhranının az təsir etdiyi olkələr sırasına daxildir. Ölkədə ÜDM artmaqda davam edir. İnvestor kimi bizim üçün bu çox yaxşı informasiyadır, çünki, biz bu bazarda çalışırıq. Bizim üçün gələcək inkişafın əsas amili iqtisadiyyatın və proqnozların stabilliyidir. Azərbaycan üzrə proqnozlar isə çox yaxşıdır. Biz növbəti ildə, qlobal maliyyə böhranı ilə əlaqədar olan bu cür qısamüddətli azalmadan sonra, artımın olacağına ümid edirik.
- "Baltika-Bakı" bu il üçün proqnozlaşdırılan gəlirlərə çıxa bilibmi?
- Xeyr. Yaranan vəziyyyətlə əlaqədar olaraq zavod gözlənilən gəliri əldə edə bilməyib. Zavodun maliyyə göstəriciləri bir qədər pisləşib, lakin biz xərclər üzərində işləməyə nail olmuşuq. İlin yekunları üzrə göstəricilərin yaxşılaşması tamamilə mümkündür. Zavodda Rusiyadan bir neçə nəfər işləyir, işimizin inkişafında biz yerli kadrlara da arxalanırıq. Əməkdaşların mövsümi sayı bir neçə dəfə artır, bu zaman işçi heyətinin daimi sayı 200 nəfərdən çox təşkil edir.
- Məhsullarınızın qiymətinin azalması üzrə səbəb və ya planlar varmı?
- Xeyr, zavodun strateji inkişaf planında qiymətlərin azaldılması nəzərdə tutulmayıb. Belə ki, azalma malın yığılıb qalmasının nəticəsidir. Bizim məhsullarımızın qiyməti şirkətin fəaliyyətini müəyyənləşdirən bütün digər maliyyə parametrləri kimi stabildir.
- "Baltika-Bakı regional müəssisə olacaqmı, yoxsa onun məhsulları yalnız Azərbaycanın daxili bazarına yönəlib?
- "Baltika-Bakı" zavodu artıq regional müəssisə olub. Zavodun məhsullarının ixracı hələ investisiya qoyuluşunun əvvəlində planlaşdırılıb. Yaydan etibarən pivənin logistik infrastruktur göstəricilərinə və Azərbaycanın coğrafi mövqeyinə görə ən münasib tərəfdaşı olan Gürcüstana ixracına başlanılıb. Nəqliyyat logistikası Rusiyada yerləşən zavodlara nisbətdə çox ucuzdur. Hazırda Gürcüstana 40 min litrdən çox pivə tədarük olunub, ilin yekunlarına əsasən bu rəqəm 400 min litrə çatacaq. Əgər zavodun inkişafı planlaşdırılan templərlə davam etdirilərsə, Azərbaycandan "Baltika" pivəsinin Xəzəryanı ölkələrə, hətta Xəzər üzərindən digər respublikalara ixracı da mümkündür.
