Böyük Britaniya, London, 10 mart / Trend , müxbir N.İsmayılova/
Azərbaycanda yeganə qızıl istehsalçısı olan "Anglo Asian Mining plc" şirkəti bu ilin sonuna kimi Azərbaycanın "Gədəbəy" qızıl-mis mədənindən 72 min unsiya qızıl istehsal etmək niyyətindədir. Bu barədə şirkətin prezidenti Rza Vəziri martın 8-də Londonda keçirilən "Böyük Britaniya Azərbaycanda" ticarət-investisiya forumundakı çıxışı zamanı deyib. Forum Yaxın Şərq Assosiasiyası (Middle East Association) və Azərbaycan Beynəlxalq Bankının dəstəyi ilə təşkil olunub.
"Hasilata başlayandan bəri təxminən 18 min unsiya qızıl istehsal olunub və bu gün istehsal prosesi davam etdirilir. Bu ay biz dörd min unsiya qızıl istehsal etmişik və ayın sonuna qədər qızıl istehsalı təxminən beş min unsiyaya çatacaq. Bununla da bu ilin sonuna kimi biz 72 unsiya qızıl istehsal etmək niyyətindəyik", - Vəziri deyib.
Onun sözlərinə görə, şirkət Gədəbəy yatağında mis hasilatına təxminən 10 gün əvvəl başlayıb.
"Maliyyələşməmizin böyük hissəsi Azərbaycan Beynəlxalq Bankından daxil olur və biz həmin bankla fəal işləyirik", - o deyib.
"Anglo Asian Mining PLC" şirkəti 1997-ci ildə Azərbaycan hökuməti ilə imzaladığı PSA tipli müqavilə əsasında Azərbaycanın şimal-qərbindəki altı yataqda - Gədəbəy, Qoşa Bulaq, Qızıl Bulaq, Veynəli və Söyüdlü yataqlarında işləmək hüququna malikdir.