Azərbaycan, Bakı, 14 aprel /Trend, müxbir Ü.İsmayılova/
Hökumət hemodializ zamanı istifadə olunan filtrin idxalı üçün əlavə dəyər vergisini (ƏDV) ləğv edib.
Nazirlər Kabinetinin sərəncamına görə, vergidən azad olunma 84-cü qrupa (8421 29 000 1 - hemodializ zamanı istifadə olunan filtr) daxil olan mallara şamil edilir.
Bu qərar səhiyyə, maliyyə, iqtisadi inkişaf, vergilər nazirliklərinin, həmçinin, Dövlət Gömrük Komitəsinin razılaşdırılmış təklifləri əsasında qəbul olunub.
Qərar aprelin 12-dən qüvvəyə minib.
Respublika Kliniki Uroloji Xəstəxanasının məlumatına görə, ölkədə iki yaşından 80 yaşına kimi hemodializə ehtiyacı olan 1 500-ə yaxın xəstə var və onlar dövlət tərəfindən müalicə olunur.
Statistikaya görə, Azərbaycanda bir milyon nəfərə 200-250 nəfər böyrək çatışmazlığından əziyyət çəkən xəstə düşür. Həmin xəstələrin 55-60 faizi hemodializ ilə müalicə olunur. İl ərzində belə xəstələrin sayı 23-27 faiz artır. Əgər 2003-cü ildə dövlət 137 dializli xəstənin müalicəsi üçün vəsait ayırmışdısa, hazırda onların sayı 1400 nəfərdir.
Azərbaycanda iki yaşından tutmuş 80 yaşına kimi əhali bu xəstəlikdən əziyyət çəkir, ən çox 20-dən 45 yaşadək olanlar bu xəstəliyə düçar olur.
Hemodializ kəskin və xroniki böyrək çatışmazlığı zamanı qanın böyrəkdənkənar təmizlənməsi metodudur.