Azərbaycan, Bakı, 16 aprel /Trend, müxbir N.İsmayılova/
Azərbaycan hər il yol-nəqliyyat qəzaları nəticəsində 1,2 milyard dollar itirir. Bunu cümə günü Dünya Bankının (DB) Azərbaycandakı nümayəndəliyinin rəhbəri Qreqori Yeceyçak "Yol-nəqliyyat qəzalarında ölüm hallarına qarşı mübarizə: Avropanın və Mərkəzi Asiyanın yollarında təhlükəsizliyin təminatı" adlı hesabatının təqdimatında deyib.
"YNQ yalnız böyük sayda insan itkisinə səbəb olmur, həm də ölkə üçün ciddi iqtisadi xərclərə gətirib çıxarır", - Yeceyçak deyib.
Onun sözlərinə görə, yol-nəqliyyat hadisələri zamanı ölüm hallarının 40 faizə qədəri piyadaların payına düşür və postsovet məkanındakı digər ölkələrdə olduğu kimi, əsasən, ölkənin əmək qabiliyyətli əhalisini əhatə edir.
"Dünya Bankı digər beynəlxalq təşkilatlar, o cümlədən, Ümumdünya Səhiyyə Təşkilatı və Qlobal Yol Təhlükəsizliyi Komissiyası ilə birlikdə bu yaxınlarda BMT-də qəbul olunmuş 2011-2012-ci illərdə yol təhlükəsizliyi tədbirlərinə dair plan çərçivəsində Azərbaycana texniki və maliyyə yardımının göstərilməsini davam etdirəcək", - Yeceyçak deyib.
