Azərbaycan, Bakı, 22 aprel /Trend, müxbir N.İsmayılova/
Beynəlxalq Valyuta Fondunun (BVF) proqnozlarına görə, Azərbaycanda ümumi daxili məhsul (ÜDM) artımı 2010-cu ildə 2,7 faiz, 2011-ci ildə 0,6 faiz, 2015-ci ildə 0,7 faiz təşkil edəcək. Bu barədə fondun "Dünya iqtisadiyyatının perspektivləri" adlı məruzəsində bildirilir. 2009-cu ilin oktyabrında BVF 2010-cu ildə Azərbaycanda iqtisadi artımı 7,4 faiz səviyyəsində proqnozlaşdırıb.
BVF-nin proqnozlarına görə, Azərbaycanda inflyasiyanın səviyyəsi 2010-cu ildə 4,7 faiz təşkil edəcək və 2011-ci ildə 3,5 faizədək, 2015-ci ildə üç faizədək azalacaq. 2009-cu ildə Azərbaycanda inflyasiya 1,5 faiz təşkil edib. BVF-nin oktyabr proqnozlarına görə, bu göstərici üzrə ilkin proqnoz 2010-cu ildə 5,3 faiz təşkil edib.
Ölkənin ödəniş balansında cari hesab saldosu 2009-cu ildə ÜDM-dəki 23,6 faizdən 2010-cu ildə 25,3 faizədək artacaq. 2011-ci ildə bu göstərici 24,2 faiz, 2015-ci ildə 23,7 faiz təşkil edəcək. Oktyabrda dərc olunmuş məruzəyə görə, BVF 2010-cu ildə cari hesabın müsbət saldosunu ÜDM-in 23,1 faizi səviyyəsində proqnozlaşdırıb.
