Аzərbaycan, Bakı, 18 iyun /Trend, müxbir Ü.İsmayılova/
Azərbaycanın sığorta şirkəti "Era-Trans Siğorta" tibbi sığorta xidmətinin göstərilməsi üzrə lisenziya alınması üçün Azərbaycan Maliyyə Nazirliyinə müraciət göndərib, - cümə günü şirkətdən məlumat veriblər. Lisenziyanın alınması yaxın günlərdə gözlənilir.
"Sığorta bazarında yüksək tələbat olduğuna görə, şirkət rəhbərliyi tibbi sığorta üzrə lisenziya alınması qərarına gəlib", - şirkətdən bildiriblər.
1994-cü ildən bəri fəaliyyət göstərən "Era-Trans Sığorta" şirkəti sığortanın 24 könüllü və 4 mütləq növü üzrə xidmət göstərir. Yanvar-aprel aylarının yekunları üzrə şirkətin sığorta haqları 0,46 milyon, ödənişləri isə 0,22 milyon manat təşkil edib.
Bütün sığortaçıların tibbi sığorta haqlarının həcmi yanvar-aprel aylarında 11,005 milyon, ödənişləri isə 5,17 milyon manat təşkil edib. Bu dövr ərzində sığorta haqlarının ümumi həcmi 53,72 milyon manat, ödənişləri 14,52 milyon manat təşkil edib.
